حبيبي شِفْت فوق الأرض لَمْعه

ضياها ماخِذٍ ضَيّ النجوم

أحِس لْجَلْستي وِيَّاك مِتْعه

تنسِّيني المآسي والهموم

غرامك حَط لي في الدَّم جرعه

غلاك يْزيد يومٍ بَعْد يوم

حلاة الحب لا من صار وضعه

غَلا متبادَلْ وْقَلْبٍ رحوم

وحبٍ ينتهي وِيْروح سرعه

على تبعه أنا ما لي لزوم

أرِدّ الباب من دونه وامِنْعه

ولا ياخِذْ من عْلومي علوم

حرام تْسِيْل فوق الخَد دَمْعه

على أوهام واضغاث وْحلوم

حبيبي يِنْفِنِدْ مِنْ بين رَبْعه

مسالِمْ لا جحود وْلا ظلوم

مِنْ سْلومه ومن عِرْفه وْطَبْعه

يحاضِيْني كأنِّيْ شيخ قوم

واذا في يوم مِنّى راد فَزْعه

أنا روحي على شانه أسوم