شعر: عبدالله العصيمي

طاب الهوى لْقَلْبي وقلبي طاب له

ما دام خِلّي بالمحبّه طاب لي

لو شِفْت غيري يشتكي مَحَابله

دايم وهو يشكي يقول أنّه بِلِي

رَبّي عطاني اللى رموشه ذابله

وانا احمده دايم على ما جاب لي

هو فَرْحَة الليله وفَرْح القابله

ضيف بْحَشا خِلّي وهو مستقبلي

خَلَّى فوادي يرتوي من وابله

من غيم حبٍ دايمٍ سَكَّابْ لي

أروى عروقه واثمَرَت سَنَابله

أزْهَرْ وخالَطْ حابله بالنَّابلي

رَوْضٍ خَضَر ومْغرّده بَلابله

ريضانها تشبه حدايق (بَابلي)

لكنّ به عَيْبٍ وغَصْبٍ قابله

دَلّوع.. ما له حِيْلِةٍ بِمْقَابلي

وانا كما حرٍ وقَلْبه ذاب له

يبى المطير وبالسبوق مْكَبّلي

واللى جعَلْني ما اقْربه واقابله

إنّي على السِّنّه ومذهَبْ (حنبلي)