بمناسبة عودته للوطن معافى

الأمْن نِعْمه عظيمه والوطَنْ غالي

والأمْن قَلْب الوطَنْ وِعْيونه وْدَمّه

والأمْن في دار (زايد) مضْرَبْ أمْثَالِ

الله يديمه ونبقى فوق في القِمّه

بِقْيادة الحرّ روح بْلادنا الوالي

والي على ارواحنا بِقْلوبنا نْضِمّه

(خِلِيْفَةْ) المَجْد له موطن وْمِنْزَال

يرقى به المجد يبقى تاجه وْعَمِّه

(خليفة) الجود والحكمه والافْعَالِ

نِعْتَزّ به وْلى يِبَاه نْتِمّه نْتِمّه

والشَّعْب خَلْفِه يعِيْش بْعِزّ واجْلالِ

محشوم شامخ جبينه عالي الهِمّه

يا صاحبي اللى غفَلْت وْدَالِهْ وْسالي

صَحْصِحْ وتَحْت الثرى يا ما اكْثَر الرِّمّه

يا كَم شعوبٍ تهاوَتْ ما لها تالي

والشَّرّ خَيَّمْ عليهم وانْتِشَرْ سَمّه

تصْبح وْتَمْسي بْهموم ونار واهْوَالِ

كلٍ يصيح الوطن متوسِّدٍ هَمّه

والظلمْ فيها تسيَّد والعَدِلْ زَالِ

ومْطالِبْ الحَقّ يَحْفِر قَبْره بْغَمّه

مليون آه غْرِقَت في دَمّ الاطْفَالِ

وِتْلاشت قْلوب كانت دوم مِلْتَمّه

يا ما اكْثَرْ وْجوه ما ترْحَم وَلا تْبالي

مِتْسَتّره بالصّلاح وْما لها ذِمِّه

لا تِنْجِرِف في هموم القِيْل والقالِ

بَعْض البشَرْ سَمّ لو يَقْطِر عِسَلْ فَمّه

الله ثم الوطن ثمْ شيخنا الغالي

نموت من أجْلهم وِنْعَانِقْ القِمّه

بمناسبة عودته للوطن معافى