سود الليالي حِبْر.. والعمر الاوراق
تكتب عليها ذاهبات الليالي
هذي بها توديع وِعْناق وِفْراق
وْهذي بها ميعاد شوف الغوالي
وما يعرف الدنيا سوى كل مشتاق
أزْرَتْ به الدنيا على كل حالي
وْرَجْلٍ طموحه فاق الآفاق ما فاق
إلاّ على غدر القريب الموالي!
يا صاحبي دنياك سوقٍ على ساق
والمشتري بَيّاع والسوم عالي
والخاسر اللى ظَنَّها دوم تنساق
والرَّابح اللّى باعها بالتوالي
يا صاحبي شوف السّهر تحت الاحداق
سَوّى ظلال.. وخَذ من الشّوف غالي
يا صاحبي شوف العمر مَرْ ما راق
للثغر كاس وحِلْوها ما صفا لي
إلاّ غديرٍ عَذْب جِيْته بالاشواق
واطفيت به حر الظما بالزلالي
هذاك في صدري من الوِد ميثاق
أخفيت له.. وِنْسِيْت غَدْر الليالي