الآتون من وراء الأفق من خلف الجدران المتهالكة من أمواج الخليج والمحيط يدققون بأصغر التفاصيل وكأنهم تجار الماس أو لؤلؤ، انهم ما تبقى لنا من ذلك الزمن الآفل ولكنه حاضر في مخيلتهم وذاكرتهم التي تستنطق الماضي حاضرا ومستقبلا، تراه يكلمك عن عمر مديد مضى أفناه في العمل وخدمة الوطن والشيوخ 65 عاما عملا زادته قوة وإصرارا وجعلته مرآة الحاضر على الماضي..
تسمع منه حكاية موروث شعبي حكاية رمضان واللمة حكاية العمل والانتقال من الجد إلى الأب والابن عاصر الشيوخ ومازال شاهدا على التأسيس انه الوالد هلال خادم الحميري الذي حدثنا عن ذكرياته مستهلا كلامه ::جمعة رمضان:لما يهل رمضان علينا نفطر رباعة فارشين كل يجيب فطوره يوم يأذن المغرب نأخذ تمرة وماي وفنجان قهوة وانش واحد يصلى فينا ثلاث ركعات المغرب، وقال ياالله عاودوا للفطور وفطروا.وتمينا نصلي التراويح وتربعنا وكل سار بيته والبيوت خيام والضاو شب والدلال في الضاو وواحد يقرى نسير عند اللي يقرى ويوم يأتي السحور تسحرنا ماشي آذان أخير ماشي توقيظ للسحور نشوا وتسحروا واللي بيسرح سرح، وكنا راعي البحر عايش على بحر، وفي الشتا نكد السمج وفي القيض نكد اللولو في غوص، وراعي البر عايش يبيع الحطب ويبيع اللومي ويبيع الرطب وهذي رحلتنا الأولية.:65 عاماً عملاً:من العين لين أبوظبي نأخذ سبعة أيام في الطريق وأنا عمري 16 سنة يت عند المرحوم الشيخ زايد الله يغفر له ويسكنه الجنة في أبوظبي والشيخ خليفة كان صغير الله يطول في عمره، وخلاف حطني عل الباب الشيخ زايد الله يرحمه بواب، وانا اعرف اللي راعي وطن يدخل واللي غير راعي الوطن ابلغه الحاصل وتميت تسع سنين عل باب.
ومن بعد سلمني للشيخ خليفة وتميت عند الشيخ خليفة وسرت المقناص وياهم وسرنا الربع الخالي والحمراء وتميت عنده سنين ومن بعدها اتسلمت الشغل عند الشيخ سلطان ولده وتميت عند الشيخ سلطان وسرت وياه القنص وأعطوني تقاعد بعد 65 سنة شغل، وأنا بخدمة الشيخ زايد والشيخ خليفة والشيخ سلطان عند الشيوخ كلهم، وقالوا لي عاد بسك هلال، قلت الله يطول أعماركم تميت في التقاعد والمعاش.
60 درهما راتبا
كنا نأخذ في ذاك اليوم 60 ر،وبيه الدريول 80 روبيه، ونحن المطارزية، نهبط سوق العين ونتشرى كل شي، يونية العيش سبع روبيات الخروف ثلاث روبيات التمر روبيتين، وأنا ما درست من ذاك اليوم الغاب فيه عنا أبونا وتميت أنا اكبر إخواني أكد عليهم أكد البحر، وأكد السمج وأكد الغوص، وأكد الهوش وعيشت إخواني لين كبروا وتجوزوا.
المدارس القرآنية
وأنا جيت عاد عند الشيخ زايد عند سن الـ 16 ، ذال الوقت ماشي مدارس، مدرسة قرآن موجودة، وأحيد الشيخ السيد محمد الهاشمي كان على العلماء كلهم من مكة لين البريمي، فوق العلم كله فوق العلام وعنده سؤال وعنده معجزات قرآنية وأنا اجلس عنده، أخذت الأحاديث الدينية قبضتها.
ويلزمنا بالحفظ وانا خذيت العلم منه من جلستي وياه، ويخبرني تبى تستفيد يا ولدي وبعد بتفيد ناس لازم تتعلم، وجى للقاضي واحد شارب خمر وقال أنا طلقت حرمتي وما عندي شعور وطلقتها وابي أردها، قال له عندك سبعين جلده وحرمتك ما تيوز لك وما تاخذها إلا تأخذ زوج بعدك وبعد ما تطلق تيوز لك بعدين وهذه حكمه.
مجموعة مهن
اعرف القنص واعرف الشعر واعرف اعالج وعندي خبره في الوسم اقلع الأضراس واعلم الآدمي اذا كان فيه شي قلت له هنيه أوسمه وأقرا عليه قدر نصف ساعة أو عشر دقايق ولا ربع ساعة أصبح بخير، قال يعوره بطنه قلت اشرب حلول.
تعاون الناس
ولما تستوي حربيه أو رزفه أجيب لهم شلات، ونشل ونرزف في الأعياد ثلاثة أيام والاعراس أسبوع نرزف لين يجينا النوم بعدها روحنا ماشي عشه ولا شي قهوه صبوا عليك فنجان قهوة وانت ترزف وإياك دخون العود بس وجابوا الطماش وروحوا من باجر لين يذهب المعرس قالوا من باجر صبحونه صبحوا الصبح وشلوا الزهبه على حمار مطرح وسبحه للعروس والرزفه تسير وضرب التفق يسير صوب بيت العرس.
قالوا تقهوى ونشوي اللحم، شهر عسل ما شي، من تهبش راسها تصبح معرس قبضها بيده مره روح بها، واذاعنده مطيه ركبها على مطيه اتسوالى فرشه فوق ظهرى والمطرح تركب من داخل حواشك والعرب وراك محوطين بك والتفق والشلات لين توصل البيت.
وصل البيت قالوا ياالله العريس ياي وحرمته وانتوا تقهووا وكل يقبض دربه هذا حديث الأولين، وكانوا يزورون بعض من صب القهوه قالوا يا فلان جو بيتك ولا بيتي ويبوا أكل اللي يشيل ذلته وصحن التمر وفرشوا وتقهوو وكل سار.
العمل في رمضان
لما يهل رمضان نفطر رباعة فارشين كل يجيب فطور يوم يأذن المغرب خذوا تمرة وعلى فنجان قهوة ونش واحد وصلى ثلاث ركعات المغرب، وقال يالله عادوا للفطور وفطروا ومن يفطرون واحد يقرى، تمينا نسير عند اللي ما يقرى ويوم ما يأتي السحور تسحرنا ماشي أذان أخير واللي بيسرح سرح قنص وييب حطب على الحمار أو يحش حشيش للحمار أو قنص وهذا شغلهم.
والشتا نأخذ اثنعش يوم ما نشوف الشمس ويوم يظلم الظلام فطرنا على المغرب ويوم نقايس الظهر الله يبين الشمس قلنا الظهر يا بانت الشمس ويوم نصلي في المسجد ويا المطر نقعد لين يوقف المطر.
وتمينا على الباب نصلي التراويح يوم وقف المطر تربعنا كل سار بيته والبيوت خيام والضو شب والدلال في الضو، وبيوت طينية إلا اللي عنده فلوس مسؤول يسوى مخزن وإلا الباقين كلها زور، عرشان خيام إلا بيت الشيخ والسوق من أربع لين خمس دكاكين هذا هو سوق القطارة.
تطور
بعد هل ايام استوت الأسواق بفضل الشيوخ الله يطول أعمارهم، والمعاش ستين درهم، يوم تهبط السوق تتشرى كل شي تبيه، والدكاكين طين والبنيان خشب والحرس اللي يبات يحرس السوق عن الحراميه في النهار يخدم على عمره وفي الليل من يصلي العشا ياك ورقد ومن يصلي الفجر روح سار يخدم يخلص سار يحش للهوش سار البر وفي الليل من يتعشى وصلى العشا ياك حرس واحد ولا اثنين، وجونية العيش بست روبيات.
لين أخذت التقاعد أنا وربعي ستة وستين خمسة وستين سنة، ومدّيت الغوص عند خادم بن محمد بن بطي القبيسي، خال الشيوخ وهو من شيوخ القبيسات المعروفين، خال الشيخ حامد بن بطي والشيخ حامد هو خال الشيخ زايد والشيخ شخبوط الله يرحمهم.
نقري الضيف
وأول نسكن في البر فريج عشرين بيت ثلاثين بيت ضيفك اذا جاك دور راعي الذبيحة معروف يوم واحد وإلا اثنين يسموها وليمه ما هي ذبيحه وإلا ان جا شيخ من واحد أو اثنين يذبحون ويوم يتعشي الضيفان زقرنا الريال جو أهل الفريج وتعشو محل الضيفان من الذبيحه وثاروا غسلوا يديهم وساروا، ين النسوان كلهن أكلن.
والصبح يتقهون في الحضيره صحن التمر ودله القهوه في الحضيره محطوط صندوق قهوة كلنا يجيب دلال ويحطها فيه والدلة هالكبر الماء داخل يصبون فيه يغرفون، ويهبش من الصحن وصب الفنجان من الدلة، وقال واحد معوره بطنه قال اشرب حلول دخاتر ما شي حبوب ما شي.
الحلول والوسم ما شي غير، قالوا مات فلان قالوا موته أخير من حياته حتى عياله عارفين كمل له امية و ثلاثين سنة أو امية وأربعين سنة شيبه ما قالوا حادث ما قالوا انقلب الحمد لله ما شي، موت عادي من دون سبب شيبه عجوز.
جزاء الاجتهاد
ويوم يقرى الولد المصحف ويكتب الخط ويقرى أعطوه روبيتين وتعشوا ذاك الليلة، والحرمه تربي بدون دختر بدون كشف بدون عملية عادي، واحد عنده حرمه هو جارنا كانت تراعي الأغنام دق عليها الوجع وربت بالسيح وحطت ولدها بصدرها، الاب يطالع قال لها بشري قال أبشرك بولد قام وضرب بالتفق وحطت ولدها وسوت العشا يومين ثلاثة أيام وصحت ما فيها شي.
زايد من يومه قائد
كان مقر الشيخ زايد الله يغفر له في المويجعي والشيخ خليفة والعائلة وانا كنت على الباب بواب عندي اثنين من شيبنا هذا باب الرجال باب المطارزيه ما شي ذاك اليوم دفاع ولا شي شرطة كله جيش مدني هذا منصوري وهذا ظاهري وهذا عامري وهذا احبابي والحوش مملوء يجي ستين سبعين نفر.
ونحن بوابة الثالث وكانوا الظاهري والعامري والناصري والنيادي موجودين والشيخ زايد الله يرحمه مسؤول عنهم كلهم في الحكم من الهيلي والجيمي والقطارة والعين والمويجعي كلها الشيخ زايد عنها ماسول، وكان شيوخ القبائل كل في بلاده ويقوم على جماعته واما الحكم والدولة عند الشيخ زايد الله يغفر له.
هذي كلهم تبع شيوخ ابو فلاح كلهم تبع حياة محمد بن خليفة عم الشيخ زايد عمه وابن عمه زايد بن سلطان بن خليفة وهذا محمد بن خليفة جدهم كلهم واحد، والحكم عند زايد وباقي الشيوخ في بلادهم والحبس عند زايد والأمر عند زايد، وكان يوكل عنه وايدين حط واحد يقال له أحمد محمود البلوشي حطه لين ساير لندن حطه شيخ وكيل يامر وينهي عند الامر، ويحط ولد عمه الشيخ طحنون.
وكان دائما الموجودين عنده اللي من الظواهر محمد بن هزام ومن العين سلطان بن يازية وعنده محمد بن شيبان ومبارك بن فاضل وعنده من المناصير محمد بن سنديه وعنده مبارك بن جران وعنده من المزاريع على بن غانم وعيسى بن غانم وعنده راشد بن مغيت وجمعة بن مغيت هذيل من اهل الخيل وعنده رجال من الاولين ما حد باقي منهم، وفي الليل نرمس اللي على الباب واللي يجي بلغت به.
وفي القيض الرمسه فوق السطح وعقب صلاة العشا يبقى سالم بن حم ومبارك بن فاضل هذيل الخصوصيين عند الشيخ زايد اللي يبقون لين آخر الليل وإحنا ما نام نشب الضو لين يجي الناس.
اول سيارة
والسيايير جت العين من قديم عند الشيخ ماشي الا عند الشيخ خليفة بن زايد الاولي عم الشيخ زايد ابو محمد بن خليفة يد خليفة بن زايد، طرشها عيسى بن سلمان من البحرين جيمسي ويا عند الباب وتمت خلق الله كل يوم تتصبح تطالع الجيمسي ويسوق حياة يحى هودريول بحريني وسائق في البحرين وخلاه الشيخ خليفة بن زايد الأولي عنده دريول ويوم يجي الصبح سرح على البريمي وعلى الهيلي وعلى الجيمي والمويجعي ووقف ونحن نتريا وخلق الله تتريا متى بيي ها الموتر يسمونا موتر وخلاف يات السيايير واستوت الدنيا اتبدلت الحمدلله وكثر الخير والشيوخ ما قصروا الله يطول أعمارهم.
مهن
اعرف القنص واعرف الشعر واعرف اعالج وعندي خبره في الوسم اقلع الأضراس واعلم الآدمي اذا كان فيه شي قلت له هنيه أوسمه وأقرا عليه قدر نصف ساعة أو عشر دقايق ولا ربع ساعة أصبح بخير، قال يعوره بطنه قلت اشرب حلول.