هي الذكريات يغزلها على الحاضر فيعيش حالتين ضمن نطاق الحالة، قضى جل عمره في تلك الفترة الموغلة والتي يعتبرها الخير والعطاء وحب الآخر، لا يحدثك عن الآن لأن الأمس بالنسبة له حاضره ومستقبله، ولكن بقوة العزيمة والجلد والذاكرة المتقدة التي منحه إياها الله تراه يهتم بأدق التفاصيل ويحفظ أماكن اندرست وأصبحت أطلالاً، ولكنه يستجلبها ليقول:
لك فلان مر من هنا، وفلان سكن هنا، وكنا نقيض هنا. انه ذاكرة الزمان عندما تجد الزمان وقد تفلت من عقاله من غير رجعة، ولكن من بقوا لنا هم التراث والإرث، وكل ما يمكن أن يجعلنا نلتصق بالأرض لأنهم مثابة الجذر من الشجرة، إنه الوالد سلطان بن أحمد بن سلطان الكويتي.الوالد.. نبي نعرف اسمك بالكامل للتوثيق؟أنا سلطان بن أحمد بن سلطان الكويتي، مسؤول من قسم الأفلاج بالعين بأمر من الشيخ زايد الله يغفر له وتوقيع الشيخ طحنون، أني أكون مسؤول قسم الأفلاج، وأنا ما درست إلا عند مطوع القرآن واسمه المرحوم محمد بن سعيد.
الوالد.. كلمنا عن أفلاج العين؟الأفلاج هي: *فلج العيناوي: ويسمى أم المراغ الأصلية، وبعد تسمى الخزامية وأم البعر «ثقيه» ما بين الخزامية أم البعر يسمى الساعد البارد، وبعد تسمى أم العروق، وبعد تسمى ثقية القوز ثم يتجه إلى الصاروج، وبعد يسمى الشريعة، وبعد تسمى عامد المسجد بعد عامد الشريعة، وبعد يتجه إلى العامد الشرقي ويظهر على أم الهبوب مكانها الحالي عند التاكسي وبعدين يتجه إلى غرب نخيل الشيخ محمد بن خليفة ويتجه إلى نخيل القتحية الشيخ خليفة بن زايد ويتجه في البلد.* فلج الدودوي: في مدينة العين تسمى عند منطقة الدودوي، ويمر بالقرب من بيت حمد سعيد، ويمر بالدفاع يقطع الوادي على الثقيبة وبعدين يمر من قرب المرحوم الشيخ خليفة بن زايد الأولى على الوادي، بعدين يمر العامد الشمالي ويسمى عامد النواخذ، وعامد الجنوبي يسمى عامد المطاوعة.
*فلج الجاهلي: امه داخل دائرة الزراعة حاليا، يمر على بيت أحمد بن حامد ويمر وسط مدينة العين، يمر على الصحة من الشمال (كانت سابقا بلدية العين والحين اسمها الصحة)، ويمر على البريد ويتصل حتى في بيت الجاهلي.
* فلج المويجعي: يبدأ من محل الجوازات القديمة حميراء بالقرب من بيت عبدالله غنوم ويمر في الحديقة العامة ويدخل داخل منطقة فلج المعترض.
* فلج الجيمي: امه من غرب مزرعة الشيخ خليفة بن زايد، ويمر بالمشتل، ويمر مزراعة عبد الجليل الفهيم، ويمر بالوكالة البريمي بهوان، ويتجه إلى سوق حماسه يمر بالوادي والشرح عند السوق غرب السوق عند المسجد والشرح واحد عند مسجد بن شاري ويتجه إلى الجيمي.
* فلج القطارة: يبدأ من جنوب صحراء الشرق ويمر حتى اتجه بيت القط في نخيل البريمي، ويمر بمزارع أهل البريمي ويمر على مسجد مطر بن سالم ويتجه إلى القطارة، والله اعلم بالصواب.
* فلج الهيلي: يبدأ من منطقة العوهه وسماها الشيخ زايد الله يغفر له الفوعة، ويمر جنوب مركز الشرطة ويتجة إلى ساعد بن ساعد يمر بساعد مدن وساعد العوهة ويمر على منطقة هيلي، والله اعلم بالصواب.
؟ فلج الراقي: يظهر في جنوب الليل غرب الجبل ويلفف جنوب ويتجه غرباً ويدخل غرب مزرعة الهيلي، والله اعلم بالصواب.
*فلج اثار الهيلي: قديم الفلج، والله اعلم بالصواب.
* فلج صالح: يبدأ من الردهة صالح بحدود عمان ويتجه إلى منطقة الإمارات.
* فلج مزيد: من شرق البلاد يتجه غرب شمال إلى منطقة مزيد لما تصل العين، والمعترض فلج مزيد وفلج صالح.
* فلج المعترض: يبدا من شرطة المربعة ويمر على بيت صاحب السمو الشيخ خليفة بن زايد آل نهيان، ويتصل إلى منطقة المعترض، والله اعلم بالصواب.
* أما الآبار في العين: أم غافة، منطقة ملقط، أم سديرة، طوين حمد.
* الوديان: وادي الصاروج يظهر عند على أم الشكلة وادي بو السعد والوادي الجنوبي ووادي الجبل، كلهم يلتقون عند ضخيه الجبل الدفاع، والله اعلم بالصواب.
الوالد.. وين كنت ساكن؟
أول سكن كان في حارة الكويتات، الحين حارة الكويتات في منطقة السوق، بعدين الشيخ زايد الله يغفر له عطانا بيوت شعبية جنوب المربعة، مربعة الشرطة، وسكنت فيها، بعدين الشيوخ عطونا أراضي خاصة وانتقلنا إلى منطقة الصاروج. الله يغفر لي الشيخ زايد ويطول عمر عياله عطونا أراضي واسعة، والأصدقاء سابقا كان المرحوم محمد بن هلال وعبدالله بن هلال وأحمد بن عبدالله العفريت والنيادات خوالي وأهلي، وكان الحاكم الشيخ شخبوط، الله يرحمه، داخل بوظبي وبعدين جاء الشيخ زايد الله يغفر له.
الوالد.. تذكر لنا أسماء المباني والأحياء السكينة في العين سابقاً..
نبني بيوتنا من طين واللي ما يقدر بنى من السعف والدعون عريشة وخيمة، وزمان القيض نتجه من الحارة إلى النخل ونتم فيه من أول القيض حتى آخر القيض في النخل عقب يوم تجي من النخل، يدينها وخلبانها وشمدناها وزرعنا الجد واثنين نزرع في الصيف ونحن في النخل ونزرع الحمطة ونحن في النخل، الفلج في النهار نسقي به الزرع وفي الليل نسقي به.
وهذه مع العربان أحسن، اليوم أحسن بالغنى والا العربان أوليين ما بدوم كثره، التواصل بينهم موجود وهذه مع هذه، كل شي زين وهذه المناطق العين الداودي المعترض والموجعي والجيمي والقطارة، كنا عرب وحده، نتصل وكنا نحن في مدينة العين نصلي في مسجد المرحوم الشيخ خليفة بن زايد، ومسجد في حارة النيادات يصلون فيه ونصلي العيد.
الوالد.. وين كنتوا تقيضون؟
نقيض في النخل، اللى عنده نخل يتقيض فيها وعرب أهل بوظبي وأهل دبي ييون يحضرون حق هنيه هذاك الوقت ما بين أبوظبي والعين الناقة السريعة تسير يوم والجوري هذه اللي يشيل بضاعة الجوري يأخذ خمس ستة ليال لي بوظبي 12 يوم نأخذ لي دبي نأخذ 14 يوم، والبساتين موجودة أول شي نحمل لومي لي من بوظبي بعدين يستوي القيض حملنا الجدد لي بوظبي ولي دبي، نحمل التمر والسمن والسخام والسوق داخل وسط البلد وسط المدينة، سوق العين شله الشيخ زايد الله يغفر له بنى سوق غيره، الحين العين كلها أسواق.
منو من التجار بهذيج الفترة؟
التجار أول قلال معرضة، السلامي، حياة علي بن صالح واحد بلوشي يسمى علي بن صالح وكان من أول قديم الزمان محمد سميع هو فارسي قديم، وكان في متجولين ييون البدوي زمان القيض يي في البلاد يحضر في البلاد أهل الدار الصبح في البلاد والعصر يظهر عند حزاله قرب الصاروج يبيعون اللومي والرطب والفقير يبيع الحطب شي يجيب حطب ويبيع حطب.
الوالد.. ما أهم الثروات الطبيعية؟
الثروات طبيعية راعي النخل عنده ثروة وراعي البوش عنده ثروة وراعي الغنم عنده ثروة، والحمد لله رب العالمين، العربان متساوين، العربان كانوا متساوين ومداخلين ومتصافين، والأشجار الموجودة كانت عندنا النخل وعندنا اللومي وعندنا لبه عند السمر، ونزرع الحمطة، نعم عندنا نستفيد من القيض ونستفيد من زراعة الحب، عندنا خير والحمد لله، وعندنا الشتاء يدخل العشرة والقيض الدخلة عند غروب الثرية، إذا غابت الثرية عند الظهرية تظهر على البشرة هني مسمى الثرية، وأول في الليالي تينا الأمطار يوم نودي العصر، الظهر هب الروحي ويا المطر الحين الحمد لله القدر أخف عن أول، الأول الأمطار كثيرة والغبار من يظهر السيل تصفى الجو.
الوالد.. شو الاحتفالات أول اللي تسوونها؟
كنا نحتفل في الاعراس. أو واحد عنده عيال يختنهم تستوي الإحتفالات تستوي، الاحتفالات إذا واحد عنده زرع كثير سوى قرن نسمي قرن لمن الثيران وسوى الينور ويابوا الطبول الدفوف هذه وتحسب تفكر أن أيام عيد يركبون الخيل ويركبون الركاب عند الصلاة عقب صلاة العيد، وفي رمضان الجماعة الفريج هاي يتزاقرون رباعة يوصلون رباعة بعد الفطور صلوا التروايح والتقهوا بعدين السحور رباعه اللي بسحر بروحه واللي بسحر ويه ربيعه والحمد لله العرب ونية ذاك الوقت ما شي الحمد لله لين هذه الحال.
كيف ايعزلون الابل وكل قبيلة لها عزل؟
نعم والقبائل التاليين الظواهر يسون اللاحي والنيادات يسون المطرق بني كتب يسون العرقاء كل عزل هاي العرقاة عامة كل عزل فيها هذه المطرق عام كله عزل عليه يزيد عليه يجيد عليه، الحلقة لي الشيوخ هاي غير كل يزيد عليها الشيوخ بزيدون عليها، والحين كل ريال راعي بوش مخلي ناقة بفراشها بسعنها بطاستها بدلتها كل بنوبها معلقة، والبوش يسمون ضبيان والقحيدية القحيدي يسمون صيحان المشهور عندنا نحن بدر ضبيان والمشهور بدر الخمري والمشهور الوري والمشهور صوغان هذيل المشهورات.
نبيك تعرفنا عل ازياء مال أول الأزياء الشعبية سابقا؟
الأزياء الشعبية الخنجر والمحزم والبندقية والتفك، الريال الخنجر السكين والمحزم والتفك والعصا المستد الريال المستد، والريال لو ما عنده شي زاد السلاح يخلي عنده والمأكولات كانت عندنا التمر واللبن، والفريج مسوي حظيرة يوم ييه ضيف كل جاب صحن وقهوته العشاء قال الليلة عندنا وذبح ذبيحة وضيفوا الضيف.
وش من المهن اللي كانت موجودة ذيج اليام كان في حداد أو نجار سابقاً؟
هيه حدادي كان في حداد حياه ركان وبن قاصور حداد ونجارين قليل عندنا كان ذاك الوقت، يصنعون الخشب يي الجزاعي يصنع معاريض، الريال يعرف شغله، راعي الفلج عارف شغله فليه وراعي البوش عارف بوشه سمعت إذا بصبحون راعي البوش والبدوي إذا بسرحون قال له بتسرح فلان قال له بسرح في المنطقة الفلانية، قال له اتفضل حق ناقتي، قال له لا تخب وتفطن، قال له قضيت البقعة الفلانية، راعي النخل قال اليوم أول النبات ظهر بياتيه يعرفون أثرها من أثر غيرك.
الوالد.. الفنون الشعبية شو الموجودة سابقاً؟
العيالة ورزفة البدو هذه والعيالة، موسيقى ما موسيقى أول ما عندنا، موسيقي ورقص هذه ما عندنا أول الوقت الماضي، البنت لما تكون بنت سبع سنين ما تأكل عند أبوها وأخوها، تأكل ويه أمها، البنت عند غنمها ما يقدر ريال يتعرض ليها أو يقدر يسلم عليها لو ولد خاله ما يسلم عليها يعني الاحترام عندنا وايد أول وكان عقيد الأول حياة الحاج ولده خييلي يسمى ولده وعياله هاي موجودة.
العادات والتقاليد ف ذاك الوقت؟
العادات والتقاليد إذا ياك الريال قربت بيه وقهويته، وعقب إذا يانا خاطر ذبح له ذبيحة واحدة، بعد ما ضيفه زقرت جيرانك وضيفتهم وكلوا من هذه الضيفة بعد هذه الضيفة زقرت الحريم وتحاضروا على هذه ذبيحة فيها بركة وهي ذبيحة وحدة، بعد إذا عنده فرخ صغير ما ييه ياب صحن وغطسة خذه راعيت البيت قطعه وحطته في صحن غرفت له العيش وفيها بركة والحمد لله رب العالمين، والمجالس عندنا مجالس القرآن، وكل منطقة ييه يرمسون عند الجماعة هذيل ييون تولوا ويسولفون ويرمسون، مثل اليوم قول وقلت ما عندهم، طويل وقصير ما عندهم، قالت لي وقلت كلمت الجماعة ما يعرفونها، الريال سيفة والبندقية تفقه وخنجره وعصا وخنجره الريال ما يمشي من دون سلاح.
منو كان عندكم من الرمايين؟
نعم ناس يرمون ناس يرترون الضبي عقب ما يهون نقعوا فيه، ما أذكر هذه موجود كلهم الجماعة موجودين يتعلمون أول يتعلمون الرماية ويتعلمون اللى عنده خيل ركوب الخيل يتعلمون السباحة يتعلمون ركوب الأبل حق الأثر هذه والأسلحة في الماضي كان بالسيف والخنجر الأهجمه دخلوا خذوا الصمع خذو التجار أم العشر بتايين ريال يحزم بطنه سلاحه ما يبيعه، والخيالة الخيل مع الشيوخ، الخيل مع الشيوخ مش مع الجماعة الخيل لي الشيوخ رياييل الشيوخ كلهم مضمرين كلهم خيالة الوالد تذكر لنا مطاوعة وأئمة ومساجد؟
مساجد نعم عرب البلاد منا وفينا منهم وفيهم موجودين الأولين حياة الكندي من بوظبي وييون غانم وعيالة غانم من بوظبي.
نبيك تذكر لنا أطباء شعبيين لمن كان حد يمرض وين يسير فيه وين يتعالج؟
بالميسم وناس يعرفون إذا فيك كبج قالك بعض منهم أنا سمعت إذا فيك كبج شت عليك ووسمك وحد يمسحها كده الكبج، الطحاوه المسحون، يبرد في عينك يقولك أنت فيج كبج، يشوف في عينك شي من الجفن شي من الشعر ينجلد وشي من الشعر يتنكش، أنا ما أعرف عاد الحين كبج الكفى هي ينطوي شعرها أو كبج وفي يضربهم باطن، الباطن يسون عنه يثمون عنه بصفاري يثمون عنه هناك ديج هذه بصفاري عاد دعايه بدخاتره وما يسمون علاج به يقولك أبوي كده وثمك ولا ياب واحد علق السابعة وثمك.
وجهات
يسافرون إلى مكة اللي يمشي الحج يسير على بوش، يسافرون إلى دبي ونقعد في على شهرين، واحد يسير بالبحر حد يسير بالخشب، كان شايب عندنا خبرنا أبو سعيد الله يرحمه، قال يركبون من المسجد وييون على بحر المحيط أول الحج شوي صعيب على بحر المحيط في مسافة وايد ويسافرون إلى دبي وأبوظبي وراعي البحر عنده القماش عنده اللؤلؤ .
معاذ محمد الزغروري- مهندس وباحث في التراث، عضو في لجنة جرد وحصر التراث اللامادي بوزارة الثقافة والشباب وتنمية المجتمع