عطر الأيام

لا تنكسِرْ خَلّك على مَرّ الايام

صفصافةٍ للريح مِنْها شكاوي

مثل الجبل يِجْرَحْه واديه ما شام

من مُوْطِنِه والسيل جارح وكاوي

لا تنحني خَلِّك على عهدك العام

عشرين عام وعَهْد الانذال خاوي

وخَلّك على عهد المحبّين مادام

لك خافقٍ من ماي الاحلام راوي

الظاعنين اللى لهم وَجْه وِلْثام

أكْثَرْ من وْجوه الصباح الحياوي

لا لا يغرّك مَن تضاحَكْ ومَن لام

الصِّدْق نادر والصداقه دعاوي

إلاّ صديقٍ شال هَمّك ولا رام

إلاّ رضاك وحَطْ وِدِّك رجاوي

الصاحب اللى سام نفسه ولا سام..

قَدْرِك ولو عَوّد بهذا شقاوي

يا صاحبي يا عطر الايّام ما حام

طيرٍ وما غَنَّى على الغصن غاوي

لك من جفون الصّبح عطرٍ وأنغام

ولك من ليالْ الشّوق شِعْر وْغناوي

شِعْرٍ إذا أنْشَدْه راع الهوى هام

شِعْرٍ اذا مَرّ المواجِعْ يداوي

والشِّعْر وَجْد ومَجْد واحلام وانسام

وحِكْمه لها صوتٍ مدى الدَّهر داوي

والشَّاعِر الشَّاعِر على مَرّ الايام

نجمٍ يحيل الليل بالشِّعْر ضاوي

شعر: سالم الزمر