كلنا للموت وان طال العمر
في النهايه منتهانا للقبور
ما يفيد الطبّ في رَدّ القدَرْ
القدَر محتوم والدنيا عبور
وكل شَيٍ لا محاله بْيندثر
ويبقى وجه الله على مَرّ الدهور
طِيْع ربّك وانتهي عَمّا زجَر
واطلب الغفران من رَبٍ غفور
الزم الطاعات وانواع الذِّكِر
ولا يغرّك حال من سوّى قصور
العمر لحظات واللحظه تمر
ولى يمر من وقت ما يرجع يدور
انتبه لِلى أقوله واعتبر
واعلم انّي ناصحٍ من دون زور
صاحِبْ الأخيار عالين القَدِر
ولا تصاحب شخص في نفسه غرور
والحذَرْ من حاسدٍ ثم الحذَرْ
إبْتِعِدْ عَنّه ولو شِفْته وقور
الحسود اللى حياته في قَهَرْ
من يشوف الخير مَعْ حَدٍ يفور!
لو غنيّ المال نفسه في فَقِر
ما يسِدّه شي ولا هو بالشكور
هي معاني صِغْتها فيها درر
والمعاني تبتغي شخصٍ صبور
والختم صَلّوا على خير البشَر
هو شفيع الناس في يوم النشور
شعر: خالد الوسواسي