شعر: سالم الزمر

(أنا بليت بْحِبّكم من هبالي

والاَّ انْت ظِلٍ ما لنا فيك مِقْيَال)

يا ليتني ما شِفْت زولك ولا لي

عينٍ أشوف بْهَا من رْموشك ظْلال

يا اللى حسبتك في هجيري ظلالي

واثْرِكْ هجيرٍ ما لنا فيه مِنْزال

ويا اللى حسبتك عذب مايٍ زلالي

واثْرِكْ سراب وْضِحْكِتِكْ خادِعْ اللال

يا اللى حسبناك الربيع الموالي

كيف انقلبت إدبار وِنْعِدِّكْ إقبال

يا واقفٍ ما بين حالي وْحَالي

وانته شبيه الدهر كل يوم لك حال!

حَطَّيْت وِدِّ ك راس حالي وْمَالي

واثْرِكْ خسارة حال ما عاضك المال

عَلَّمتني دَرْسٍ من العمر غالي

يقول هونك لا تصَدِّقْ للاقوال

ما كل من غَنَّى الهوى في الليالي

عاشق ولو غَنَّى لك ألفين مَوَّالْ

الصِّدْق نادِرْ والدموع الغوالي

ما هيب مِثْل الماي مَجْرى وْمِسْيَالْ

لكنّها الأيَّام يا عِزِّتالي

مِنْهَا عَرَفْت الخَلْق أحرار وانذال

وانا قريت الدَّرْس لو سَم حالي

وازرى بي اللى فِيْه ما طِعْت عِذَّال

واصبحت حيرانٍ على ما جرى لي

أشْرَبْ فناجيني وانا شارِد البال

كيف انْخِدَعْ رَجْلٍ عن الغِش عالي

وكيف انْطَعَنْ قَلْبٍ عن الصِّدْق ما مال!