آه يا لبّى نضوجي ويا لبّى ثْمري

وانت يا لبّيك سِرٍ ولبّيك جْهَره

آتِلَعْثَمْ لو تطالِع واعَدِّلْ مظهري

واتزيّن واتغنّج واحِس إنّي مَرَه

والعَب بْحِسْبة خفوقك إذا بان نْحَري

وانْثِرْ الشلال فوقه وْمَرّات اظهره

واحْتِضِنْك بْعيني اللي بها بان سْهَري

ولا ثقل طرْف النواعس تلحَّفْت شْعَره

واتدفّق لك براكين واشِبّ سْمري

والتقيك بْنَار شوقي.. واعوِّد بَعْثَرَه

واخْتِلِسْ بَعْض الثواني إذا سِقْت نْظري

وان تنبّه لي عدوٍ لك غديت مْشَفّره!

آه يا لَذّة عذابك بَرى حالي بَرِي

ما خبَرْت أحْدٍ يذوِّب حبيبه لا نْهَره

(لعنبوك) آموت بك موت لو إنّك شرِي

قِدْ خبَرْت أحْدٍ بريقه شَرَقْ به واسْكَره

انت من عِشْقي فقيرٍ وانا أكبَر ثري

يكفي انّك راس مالي وربحي وِثْمَره

يكفي انّي لا لمحتك أضيّع خنجري

واسْلِكْ الدرْب المعاكِس لدَرْبي واعبره

واتدوْدَه مِثْل الاطفال لا شافت عِرِي

واتساقط مثل الاوراق من غِصْن شْجَره

وانتبه من سكرتي فيك واهِزّ شْعَري

وكل ما فِقْتِك شويّه تغيّبْني عْشَره

أيه أحبّك.. أيه أعَشْقك.. ومن يدري دِرِي

ما حسَبْت حْساب غيرك لو انّي باخسره

آه يا لبّي نضوجي في حبّك وِثْمري

وانت يا لبّي صمودك ليا اهتزّت مَرَه!