شعر: سالم الزمر

لا تصَدِّقْ عين من شِفْته جميل

لين تَعْرِفْ خيرها من شَرَّها

الحِسِنْ ما هوب في الطَّرْف الكحيل

الحِسِنْ حِسْن النفوس وْسِرّها

ما تعَرْف قْلوبهم ذا مسْتَحِيْل

لين تشْرَب كاسها وِتْمرّها

لين يلْفَحْك الهوا صبحٍ وليل

لين تعْرِف حلوها من مرّها

الوجوه اللى لَهَا خَدٍ أسيل

لا تغِرِّك بِيْضها أو سمْرَها

يا فتى صبرك ترى الدهر الطويل

عَلَّمْ الجاهِل علوم اش كِثْرَهَا

لا تعجّل لا تكيل وْلا تهيل

فوق قِرْصِكْ مِ الليالي جَمْرَهَا

والمحِب اللى نوى عَنْك الرحيل

كيف ترحل روضةٍ عن عِطْرها

إصْبِرْ إصْبِرْ لا يهِزِّك كل قِيْل

لا يطمِّعْك الحكي مِنْ ثَغْرَهَا

الملامح غَرَّتْ الغِر الهبيل

لا تخَدْعِكْ: مرّها في مكْرَهَا

والرجال أجْسَامْ والحاصل قليل

لا يغِرِّك كِبْرَهَا أو صِغْرَهَا

والليالي نوقها ضَرْعٍ جليل

كم شَرَبْ عِقَّالها من دَرَّهَا

والمصايب فوقها الصبر الجميل

والنفوس العاليه يا صَبْرَهَا