الصوره اللى ضَمّها أجْمَلْ إيطار

أغلى هديّه بين كل الهدايا

مكانها صَدْرٍ بك أبْلَجْ بالانوار

والقلب دارك تحت حِدْب الحنايا

خوفي تشوفك كل عينٍ وانا اغار

عليك حتى في الصوَر والمَرايا

واخاف لا يدرون عن عِشْق واسرار

لا بَرّقوا بك وانت تِعْلى الزوايا

ما اقْدَرْ أجاهِر بك أخاف ألْفِت أنظار

ناسٍ يكنّون الفَرَحْ للرزايا!

عِذْري: لأن أهل العَذِل حولك كْثَار

وْعِذْرِكْ جمالٍ فاق حِسْن الصبايا

هديّتك تبقى لغاليك تذكار

رمز الهدايا كلها والعطايا

يا ليتها في غيبتك تجلي أكدار

أوْ يَرْتِحِلْ هَمٍ جثَم في خفايا

بِعْدك جفاف أرْضٍ رِجَتْ نَفّ الامطار

وانا بها صادي وْوَصْلِكْ رجايا

وحشة فراغك طالت الحَيّ والدار

وما للأماكن في غيابك مزايا

متى تعوِّدْ من مشاوير الاسفار

طال المسير وْلا ثِنَيْت المطايا

تعال، ضَيْم البين بي والنوى جار

والصبر مَلّ ولا بقى بي بقايا