شعر: سارة خالد الهاجري

جيت أكْتِبْ الآه ما ادري الآه تكتبني

أو كلّنا في حضور الهَم مِتْساوي

أوراق هَمِّي أقَلِّبْها وْتقْلِبْني

على طريق النيا والبعد وحداوي

صبري بدا ينكسر والوقت يغلبني

واشوف سود الليالي ذيبها عاوي

كم هاجسٍ في خفايا الروح متعبني

لا هو تركني ولاني مِنْه مِتْشاوي

في كل لحظه يزور العين يسلبني

نومي ولا هوب يرحمني ولا ياوي

حَطَّم طموحي لحد اليأس يجذبني

وعجزت أقاومه لكن ماني بْقاوي

مَرَّه أهَزْمه وهو مَرَّات يهزمني

ما ادري وش الحل دام الهَم متقاوي

المشكله أني كثر ما اصِد يلحقني

وَلَّيت يا هَم قلبٍ بالشقا ناوي

ناسٍ على المصلحه دايم تقرِّبني

والرَّب ياصل وهي تقطع ولا تْداوي

سود النوايا بدَتْ في الناس ترهبني

أجساد فيها ضميرٍ مَيِّتٍ خاوي

يا زارع الشوك غير الشوك وش تجني

وش يا ترى داخل الصندوق يا حاوي

واللّي يْهَدِمْ مستحيلٍ يْأسِّسْ وْيبني

وش فايده من مباني ساسها هاوي

الصدق والعدل والاخلاص وش يعني

في وقت كذب المشاعر وضع مأساوي