أنا طعَمْت الشَّهدْ منْ مِبْسَمْ الخِل
ذوقه حلو.. زاد الجروح إلتهَابه
منْ بُوني آنا في الهَوى دومْ مِعْتَلْ
(عِشْق الوراثه) جَدْ عَنْ جَدْ جَابه
جَدّي!! وابو جَدّي!! وابويه!! وانا الشبل!!
كلنَا ابتلينا في الغَرام وْصوَابه!!
إبْليت أنا بالحب مِنْ يوم أنا طفل!!
ترضعْني (أمّي) الشوقْ واطعَمْ عَذابه
ومنْ بَعْد فَطْمي بْيوم.. حَلْ الهوى حَل
في وسط قلبي وْجَرّ (قوس الربَابه)
حَبّيْت أنا (الشِّيْره) كمَا (مَعْشَر النمل)
لى شَافهَا سَوّى حروب وْضَرَابه
وانا مِثِلْهُمْ!! لو مَعِي تاصِل القتل!!
مَا افِك من أهْوَاه واتْرِكْ جَنَابه
مَهْمَا يعَذِّبني ولو ما أجِدْ حَلْ؟!
أبقى أنَا العطشَانْ!! وِهْوَ السَّحَابه
يا نلتقي وَاشْرَبْ وْيَرويني بْكلْ
والاّ!! جفافْ الصَّبر يَاتي خرَابه
يَا ليتني (مَجْنون!!) مَا أمْلك العَقل!!
الله رفَعْ عَنّهْ قَلَمْه وْحسَابه
والاّ!! بَعَدْ (مَعْتُوه!!) مَسْمُوحْ لو زَلْ!!
النَاسْ تعطف له وْتَرحَمْ مصَابه
لكنني.. عاشقْ!! مصَوَّبْ!! واسألْ؟!
عن (داء!!) عَيّا الطب يَكِشفْ حجَابهْ!!
لا حَلْ (بِنْ سينا) ولا (الرَّازي) أبْطَلْ!!
(سِحْر الغرام!!) وْفَك سِر!! إنتشَابه