شعر: علي بن سالم النعيمي

كتبتك شِعْر.. يا روح القصيد وْنبضه وْمَعْناه

كتبتك شِعْر من قاصي خفوقي من شرايينه

كتبتك يا بَعَدْ عمر القصيد وْعمر من يملاه

قصيدة شِعْر من شاعِرْك مِنْ روحه وْمِنْ عينه

قصيده صِغْتها لك من جديد الشِّعر لى تهواه

جديد الشِّعر لك صغته كتبته لاجل تقرينه

أنا والشِّعر والعهد القديم وْماضيٍ عِشْناه

حسبت انّي نسيته أو قدَرْت أنسى دواوينه

حسبت أنّي نسيت الشِّعر حسبت انّي قدَرْت أنساه

بَعَدْ أربع سنين وْكنت أنا ناسي عناوينه

رعاه الله يا ذاك الزمان وْيا رعاك الله

زمان الشِّعر يا شِعْر (البيان) الله يا زِيْنه

قصيد وْكان له معنى القصيد.. وكان من يقراه

يشيِدْ في مَعْنى القصيد وفي مضامينه

هلا بالشِّعر من بعد الغياب وْيا هلا وْحَيّاه

هلا به وْحَيّ من يابه هلا يا حَيّ الاثنينه

هلا بالشِّعر واللى كان من أجل الشِّعر صِغْناه

لاجل عينه كتبت الشِّعر في أحْلى تلاحينه

رجعت وما رجعت إلاَّ على شانه وْلاجل عيناه

رجعت أكْتِبْ قصيدي لى تحبِّينه

كتبت اللى تحبّينه قصيد وْشِعر تتمنّاه

عيونك لاجل ما تقرا عيونك شِعْر تهوينه

خِذِيْ مِنّي قصيدي.. لا فديتك.. لا عطيني ايّاه

خِذِيْ روحي.. خِذِيْ عمري.. خِذِي لى عاد تبغينه

خِذِي والاّ اعْطيني حب من قلبٍ أنا اتْفَدّاه

مِثِلْ ما انا عطيتك حب من قلب تْتِّفَدَّينه

(فديتك) والشِّعر جيت أكتبه لاجلك نَعَمْ والله

نَعَمْ جيت أكْتِبِكْ شِعْر وْغرامٍ طالت سْنينه