شعر: سالم الزمر

يا رب نسألك الثبات

من بعض مَفْتون البنَات

أمْسَنْ مثل بعض الشِّعِر

ما له ملامح أو سمات

مثل الصوَر مثل الرسم

مثل الشموع الذايبات

وجوه ما فيها حيا

وِوْجوه ما فيها حيَاة

ويا زِيْنهن بعض البنات

مِثْل الشموس الطالعات

أسْتَرْ من أطياف القصيد

واطْهَرْ من الما والنبات

أنقى من مْزون المطَر

واسْحَرْ من عْيون المهاة

في ثْيَابهن عِطْر الزَّهَرْ

ما فاح من تحت العباة

ما ضمّهِن ليل السَّهَرْ

ما فاتهن فَرْض الصَّلاة

حلوات في أطباعهن

أخلاق واذواق وْصفات

ما باعن أزهار الحَكي

لِلِّى دعاهن للفوات

الله يا بعض البنات

الزاهيات الغاليات

ما غَرِّهن داعي الهوى

ما مَرّهن راعي هِنات

أبصارهن ما ترتفع

إلاَّ لشمس الشامخات

هاماتهن ما تنكسِرْ

إلاَّ لرب الكاينات

يا زِيْنهن يا زِيْنهن

بعض البنات الفاتنات

الفاتنات أرواحنا

باطباعهن واللافتات

اللافتات قْلوبنا

باخلاقهن والمالكات

المالكات نْفوسهن

وِقْلوبهن والداعيات

الداعيات لْرَبّهن

يا رَب نسألك الثبات

يا رب نسألك الثبات

وِشْ غَيَّرْ أحوال البنات؟!