يقول أنا بارْحَلْ واخَلّيك وانساك

واقول انا يا الله عساها (مسافير)

قلبي سعيد ويبغي اليوم فرقاك

كَم انتظرها في سنينٍ معاسير

إرْحَل وانا بامْسَحْ من البال ذِكْراك

وْباشَطِّبْ اسمك دون رحمه وتفكير

وانسى سنينٍ ماضيه كنت وِيّاك

أوفى حبيبٍ لك وأقْرَبْ من الغَير

كِنْت الظلال اللى من الشمس يحماك

وْكِنْت القنوف المقبلات المزابير

كِنْت السنَد في يوم كِلٍ تبرّاك

مَدّيت لك كَفّي وانا نِيّتي خير

كِنْت السعَد يوم السعَد حيل جافاك

وْكِنْت الخزامى والنفَل والنّواوير

كِنْت العطايا والوفا كِنْت مَرْكاك

كِنْت الدلال الزاهيات المباهير

كِنْت الرفيق اللى على الوَقْت خاواك

يوم أظْلَم الواقع وْعِشْت التحاسير

رسَمْت لك لوحة أمل عبْر دنياك

وْسَطّرتها بالطيب والصِّدْق تسطير

خَلّيت لك قيمه وتقدير وادراك

والكلّ ينظر لك بحشمه وتقدير

وْوَصَّلْتِك اللي قاصره عَنْه يمناك

وِكْبِرْت في عين البشَر وانته صْغير

ماني بندمانه على كل ما جاك

أنا أحْمِدْ الله عيشتي طِيْب وِبْخير

وانا احْمِدْ الله يوم بانت نواياك

ويوم انكشَف لي ما توقّعْت بَيْصير

واليوم أنا مَلّيت عطْني مقفّاك

إرْحَل وْفَارِقْ ما أبي زود تبرير