شعر: علي الخوَّار

الله أكْبَر يوم ضِحْكَتْ بالعيون

نادَت (مْحَمّد) وانا فيها سَرَحْت

لو تنادي عَ البشر كلْهم يجون

إلاّ انا من لهفتني ما جيت.. رِحْت!!

شِفْتها وِنْسِيت نفسي من أكون

ما اقْدَرْ أوصف ما جرى لي لو شَرَحْت

شَعْرِةٍ ما بين عقلي والجنون

لو اقطعتها كان مِ الحب اسْترحْت

ناظرتني واخطفت قلبي بهون

بعد ما آنا من نواظِرْها انْجَرَحْت

جيت أبَسْأل وين قلبي يا فتون

قاطعتني.. لا.. لا تسألْ لو سمَحْت

راحت وْقلبي تبَعْها في سكون

وانا وَدّعْته.. وْبِوْداعه فرحْت

أدري انّه في وِسِطْ قلبٍ حنون

وادري انّي غارقٍ مهما سبَحْت

فجأه نادتني وْصَحَّتْ بي ظنون

فقت من حِلْمٍ معَه لِبْعِيْد رِحْت

أثْرِني سرحان في ذيك العيون

يوم انا بِعْيونها لحظه سَرَحْت