الصّاحب اللّى يَسْرِقْ أشعار صَاحبه
ويْعِزّ مقداره على عِزّ غيره
بالحق ما يستاهل إنّا نصَاحِبه
نصِكّ باب الشّر عن باب خَيْره
لا هِنْ من إحْسَاسه ولا من تجاربه
يلعب ولا هي الاوّله والأخيره
نترك له الساحه على حبل غاربه
وكلٍ على فعله يحَصِّل مصيره
لى عاد ما عنده وفا ما نحَاسبه
وين الوفا في شخص ما فيه غِيْره!!
الرّجل مِنّا يستحي لو تعَاتبه
شِـ تْقول في اللّى لو تلومه تثيره
رَجْلٍ عن المنقود يِخْتَطّ شاربه
رَجْلٍ على المنقود يربى ضميره!
والحق حقّ ولو يحَقِّق مآربه
لا بدّ شمس الحق تصْبَح منيره
شعر: محمد بن صويلح الهاملي