سؤال مجنون!

سافَرْت مِ الدار ما سافَرْت من قلبي

يا اللى تسافِرْ من عْيوني إلى عْيوني

ما دِمْت تحْمِلْ معاك إحساسي وحبّي

يا بَهْجة الروح ما سافَرْت من دوني

أمشي واشوفِكْ معي تمشي وفي قربي

واقْعِد واحِسّك معي أقْرَبْ مِنْ جْفوني

وانام.. والقى حلوم الليل تسهَر بي

في كل غفوه لعيني.. لك يودّوني

واشِمّ رِيْحَتْك في ثْيَابي.. وفي دربي

واشكيك هَمّي وأبكي لك مِنْ شْجوني

وان جيت أعانِق طيوفك صادِقْ وْرَبّي

إن قِلْت أنا اشْعِرْ يديني ما يكفّوني

يا صاحبي كِنْت مثلي وْكِنْت تشعِرْ بي؟

أو كان هذا جنون.. وْعِشْت بِجْنوني؟

باسْألْك.. لكن دخيلك قول.. لا تْخَبّي

سافَرْت أنا مَعْك أو سافَرْت مِنْ دوني؟!