عبره

يا كبْر ظلمك وْجَرْحي مِنْك يا كُبْره

الله يسامحْك ما ظنّيت تظلمني

لا تعتذِرْ ما بقى بْصوت العذِر نَبْرَه

خَلّك في حالك وْخَلّ الجرح يالمني

أخطيت لكن كسبت مْن الخطا عِبْره

كثر الصراحه خطا.. والوقت عَلّمني

ما هيب من قلّة التصريف والخبْره

ما غير طبع التسامح فيك ساهمني

أنا على الطيب كَفّي طايلٍ شِبْره

وِسْلوم الاجواد مَعْ الاجواد تحكمني

طبعي أحِب النقاوه وأكْرَهْ الغبره

أخاف لا مادحي وان عِبْت يشتمني

يا صاحبي لا تحِط السِّلْك في الإبره

ألوم نفسي قبل لا انته تلوّمني

تدري بقلبي وغيرك ما درى بْخبره

وراك دوم بْتهام السو تاهمني

الله يا كبْرَها في صدري العَبْره

لا الوقت يرحم ولا انته بعْد ترحمني

للصبر حَدّ ونفذ من خافقي صبره

أمّا إغْنَمْ الشَّك بي والاّ تغانمني

كتبت لك لين جَفّ مْن القلم حبره

أبيك تفْهَمْ.. لعلّك بس تفهمني