يا جنون العِشْق أنا بَسّي جنون

المصاب مْن الهوى نكبه عظيمه

ما أطيق الليل ساهر والجفون

من عَنَا التسهيد شكواها أليمه

حَدِّني حِسْنك على حَمْل الطعون

لين انا مْتوني غدَت مِنّك سقيمه

ما على جَدْوَلْك مَرَّه لو تكون

انته المعطي واياديك الكريمه

أعْرِفْ ان الجود طبعك ما تهون

وادري بْنِيَّتْك في حبِّي سليمه

غير انا مستَغْرِبْ القلب الحنون

كيف يرضى خاطري دايم يضيمه؟

يا فتونٍ حار به كل الفتون

السِّحِرْ لى تحجبه مَنْ هو غريمه؟؟

قِلْتها والصوت من حَلْق مْغَبون

كان خوفي خاتمه يمكن وخيمه

والتفت صوبي بكونه وايّ كون؟

صارت أكوان البشَر عنده عديمه

صِرْت به في ورطه وْخايف تخون

بي عزومي يوم أنا راعي عزيمه

احْتِبَسْ نَطْقي وْصِرْت أخْشى الظنون

وش يظِنّ بْيَ الغَلا بَعْد الهزيمه

قِلْت ما لي غير أبَكّي له عيون

واخْفِضْ جْنَاحي وأتْشَيَّمْه شِيْمه

ثم تبسَّم بعد ما كان مْحَزون

وانْجلَت عن شمس حِسْنه كل غيمه

وانْبَعَثْ سِحْرٍ ورا الدرّ مْخزون

يوم حَدَّثني بْكلْمَاتٍ نعيمه

شِفْت ما كنت أعْتِقِدْ شَكْلٍ ولون

صار منظومة فِكِرْ.. جوهر وقيمه

قِلْت أنا يا آسري آمر تمون

أعْلِنْ أنِّكْ صِرْت لِفْوادي زعيمه