لو بغيت أتْعَمَّدْ القَسْوه

معْك زِدّ الناس ما اقواها

من ذكَرْت أيّامنا الحِلْوه

والليال اللى سَهَرْنَاها

في غرام وْشوق في نَشْوَه

والرضى دنياك يملاها

ما قدَرْت أتْحَمَّلْ الخلوَه

مَعْ هواجيسٍ أنا أخشاها

وش تبى رضوَه وخِذْ رضوَه

طلبتي مِنْك آتمنّاها

آمر أترشّاك والرشوَه

هالعيون اللي اتّفَدَّاها

بك أنا في نعمه وْحظْوَه

يا هَنَا دنياي وِضْياها

بَسْمتِك مَعْ رَشْفَةْ القَهْوه

في الصباح آعيش ذِكْراها

طول يومي إنْسٍ وْقوّه

لين أعَوِّدْ لك وْأتْبَاهى

بالوداد ولي مَعِكْ رَجْوَه

بَسْمتِك لا تْفارِق شْفاها

ملهمي يا واثق الخطوه

خطوتِك بالغالي أفداها

لا حَشَا ما تحْتِمِلْ قَسْوه

لو تباها قِلْت ما اقواها