شعر: عتيق خلفان الكعبي

لو درى القَمْح قَدْره في عيون الجياع

امتلى بالسنابل عوده الملتوي

والسِّحِب لو يقبِّل غيثها كل قاع

العطش صار خَدّه بالمطَرْ مرتوي

والجَمِر لو رماده للدفا به شعاع

الحطَب ما تكَسَّرْ في يدين بْدوي

ولو دموع التلاقي شِبْه دمع الوداع

كان ما صار قلبٍ بالحِزِنْ مِكْتوي

والبحَر لو تمادى ينحني للشراع

وبين مِلْحه وموجه.. درّ يضوي ضَوِيْ

شِفْت رِزْق الجراده مثل رِزْق السباع

يرزق الله الضعيف ويرزق الله القوي

والغدر لو يغطّي صورته بالقناع

صعب مَنْ له بصيره.. عاد به ينغوي

الكحِل للمحاجر.. وللمحابر يَراع

وللعصافير شَدْو وكل ذيب يْعَوي

وللهزايم تخاذِل.. وللعزايم شجاع

والجفا للمعادي.. والصفا للخوي

وان بغيت أن تطاع.. فاطلب المستطاع

واصبر إن جاك حَظّك عكس ما تهتوي

وبين قلبك ودربك.. سِيْر دون اندفاع

خَلّ عنقود حبّك لين ما يستوي

النهايه بدايه والحكايه ضياع

والمرايا حقايق والخطايا طُوِيْ