غناة الروح

شعر: علي الحبابي

يا غايب ارجَعْ عواذلْنا يغشّونك

إش فيك صَدَّقْت ناسٍ ما تدانيني

وش غَيّرك يا غلاي وغيَّر ظْنونك

خَلاَّك حتى تغيّر نَظْرِتِكْ فيني

حَلَفْت لي وْقِلْت خَلْهم لا يهمّونك

ما فيه قوّه تفرِّقْ بينك وْبيني

لو كنت تدري بْغلاك بْقَلْب مَفْتونك

في ذِمّتي يا حبيبي ما تجافيني

شِفْني وانا بين ناسٍ ما يعَرْفونك

قصايدي فيك يا الغالي تواسيني

للموت أحِبّك واحِبّ اللّى يحبّونك

حبّك مَعَ الدمّ يجري في شراييني

من كثْر ما اغليك بِعْيوني يشوفونك

حَطّيتك أقْرَبْ لعيني من نظَر عيني!

عهدٍ علَيْ يا غناة الروح ما اخونك

حتى ولَو طال بِعْدك يا معَنّيني

شِفْت عاد حتى (الرياض) اليوم من دونك

كَنّ الشوارع على فْراقك تعَزِّيني