شعر: عتيق خلفان الكعبي

العِشقْ نَبْض القلوب وْشوق بِعْيون الصبايا

والحسَد صَدْرٍ مريض ونار تاليها شقا

والمطَر غيث السحاب اللى غسَل أرض الخطايا

والعطَش طعْم السراب ومِلْح ما عمره سقى

والفَرَح لحظة رضا واطفال بايديهم هدايا

والحزِن دمعة مفارِقْ من بَعَدْ ليلة لقا

والكَرَم يَدٍ ضَرَتْ تسبِق على مَدّ العطايا

والبخِل شخصٍ يخيّب فيه هقوة من هقى

والصديق إنسان يوفي.. ساعة تْضيق الزوايا

والعدو خاين.. ولكن لابسٍ وَجْه أصْدِقَا

والشجاع اللى يجول بْوِسْط ساحات المَنَايا

والردي من له يدوِّر حَزّة الفزعه تقى!

والعزيمه سِكّة أهل المجد هِمّتهم مطايا

والتردِّد من يخاف يْطيح.. ما مَرّه رقى

والصّفا قطرة ندى طاحت على خَدّ المرايا

والكدَر حوثات طين وْنفس ما فيها نقا

والنهار عْيون تكشِفْ من ضمايرْهم عَرَايا

والظلام حْجاب يستر ناس بالنوم أغْرِقَا

والوضوح أنّك تقول الصِّدْق ما بين البرايا

والغموض أنّك تصير انته مَعْ إبليس رْفِقَا

والقناعه كنْز مِنْهَا يِغْتني كَفّ الخلايا

والطمع تِجْمَع.. وْفَجْأه ما جمَعْته ما بقى

والتواضع كيف تتعلّم من الغير الحكايا

والغرور انّك تظِنّ الناس جَهَّالْ حْمِقَا

والحياة دْروب تخْدَعْ مثلما جِلْد الحيايا

والممات الثوب الابيض لك قبل تِدْفَنْ وِقَى