شعر: ريميّة
يا أبخَل الناس في جاهك وفي مالك
ناصيك مخطي.. وراجي شيمتك غادي!
«الطيب: قمّه».. ولا هي مرْكَب أمثالِك!
شِفْت الشواهِقْ.. وْقِلْت: أرْيَحْ لي الوادي!
بخيل.. حتى على اهْل البيت وِعْيالِك!!
وشلون تِشْرَهْ عليك عْيَال الاجوادِ؟!
تموت مظمي.. وماك يْجِفّ في جالِك
لو يِحْسَبْ الْمَا.. حسَبْته عِنْد عَدّادِ!
فَرْعِكْ كبيرٍ.. ولكن خانك ظْلالك
ما بك مقيلٍ لنفسي كيف لابعادي
تفخر بجدّك وطيبه ما تهيّا لك
لو هو درى بك.. محَرِّمْ جَيْب الاولادِ
تمِدّ عنقك.. وليتك تلْبِد أشوى لك!!
والبخل مِلْبِدْ يِمرّ مْن العَرَبْ عادي!!