مصيبه يوم انا قلبي على نفسي غدا راعي

لاجِل ظَبْيٍ كسَرْ ضِلْعي وْخَلَّى النفس مَفْزوعه

تبعته واتبعه وْكَنّه أبَدْ ما حَسْ باوجاعي

يمشّيني على جَمْرٍ.. على شوكٍ.. على طوعه

أهَدّي النفس واتصبّر واغَطّي الوجه بِقْناعي

أخاف آواجه العالَمْ وقالوا سالَتْ دْموعه

مصيبه والمصايب رمْح صابت من لها واعي

وَلا تحصى ولا تِنْعَدّ لي في الجوف مَزْروعه

جدالٍ صار ما بيني وبين الفكر باوضاعي

من اوّل يوم قلبي هَجّ لين يْشَرِّفْ رْجوعه

معاه الحَقّ دام انّه بذاك الزين ملتاعي

ولو حتى خَذْ ضْلوعي وصارن كلها شْموعه

صحيح أنّه ظبي ما احلى جماله دوم جَزَّاعي

من ظْلاله وتسحَرْ كل عينٍ بهجة طْلوعه

ولكن لو قتَل قلبي من اللى يصبح الراعي

وانا ما عاد بِيْدي شَي إلاّ نَفْس مَفْزوعه!