شعر: علي السبعان

صاحبي دنياك خِذْها بالشِّويش

تاليَتْها حِفْرَه وْقِطْعة قماش

لا تسوق السَّاق للدرْب العفيش

مثلما سِقْت القوافي للعَفَاش

وَسِّع الخاطر وهالضيقه على ايش

منْ صِبَر لمصيبته ماتت وعاش

لا تناظِر دنيتك من خَلْف شِيْش

إفتَح الشِبَّاك لا يْصيبك عَمَاش

طالِع الدنيا وعِيْش العمْر عِيْش

الأجل قوسٍ شِفْ سْهومه تِرَاش

لا تعيش تْحوم في الرِكْن الوِحِيش

مثل ما حامَت على النَّار الفَرَاش

دنيتك هذي بها وَحْش وْوِحَيش

واحدٍ يشبَعْ ولِلثاني عَراش

من عَرَف للكَتْف ينهَشْها نهيش

ومن جهَلْها راح كَتْفه للنَّهَاش

وانت ما تَرْكن على الرِكْن الهشيش

مثلك اذا شَاش شَوْش الوقت شَاش

لكنْ ان ما طاعِك الوقت الحريش

طاوعه لو كانت دْروبه حَرَاش

لا غدا هذا زمن (مثلك مَفِيْش)

سايرِه يا اخوك و(ادّيها طَنَاش)

ما انت وحدك مشتكي الوقت الغشيش

يشتكيه أهْل العماير والعِشاش

والقصايد من قَبِل مِدّة (قريش)

خيطها مَرٍ حرير وْمَرّ شَاش

فيه من يلقيه فوق المتْن خَيْش

وفيه من يروي به قْلوب العِطاش

وفيه من هي تَحْسِبه (موضه) و(مَيْش)

وفيه من هو يحسبه لمعة فلاش

وفيه من هو يحصده حَصْد الحَشيش

وفيه من هو يكتبه لاجل المعاش

بس قِلْ لي وِش عَليك مْن الدبيش؟!

ما لـ ماش إلاّ تِقِلْ له بَسْ ماش!

دنيتك يا اخوك خِذْها بالشويش

تاليتها حِفْره وْقِطْعَة قماش!