هذي حروفي بَعَدْ ما اسافر إقراها
من بَعْد ما كِنْت تقرا الشوق في عْيوني
عسى تساعِد على فرقاي ذِكْراها
من بَعْد ما كنت مَعْك وْصِرْت من دوني!
هذي حروفي تِمَعّنْهَا تهَجَّاها
تلقى بها لك مشاعر شوق وِشْجوني
تلقى بها كل ما كنت تْتِّمَنَّاها
من نَبْضة القَلْب حتى رَعْشة جْفوني
تلقى بها سلوةٍ لاجل آتِسَلاَّها
قصيدتي لى قريتوها ذكرتوني
تقول لك يا نظير العين وِمْنَاها
لازِلْت غالي فلا ترْخَصْ وَلا تْهوني
كِلْها مشاعر من اوّلْها إلى اقصاها
وْكِلْها وصايف خذَتْ من شكلي وْلوني
كِلْها على بَعْضَهَا وفي كلّ مَعْناها
تقول لك يا بَعَدْ عمري.. (وحشتوني)!