شعر: راشد شرار

الفرق شاسع بين مَجْبور وْغيور

شروات فَرْق الصبح عن جِنْح الظلام

الأوّلي يا هو كسولٍ أو غرور

وهذي طباعٍ تِنِّكِرْ بين الأنام

يمشي شرات السلحفاه وْلا يثور

حتى ولو كل الملا حوله قيام!

والاَّ الغيور اللى على الشِّدّه صبور

واللى رضَع سَمْت العَرَبْ قَبْل الفطام

وافي وْمِتْفاني وْضرغامْ وْجسور

عن مطلب أحبابه عيونه ما تنام

من يسمع مْنَادي ولو خَلْفه بحور

ياتيه سابِحْ ما بَعَدْ فيها كلام

في محفل الأجواد تلقى له حضور

قَرْمٍ إذا شِفْته تأدِّيْ له سلام

محبّته تكْبَرْ على مَرّ الدهور

كريم وِيْخاوي مِحبِّيْن وْكِرَامْ

وان لاح في جِنْح الظلام يْشِع نور

عليه دوم المَدْح ما ياه الملام

لو تْروم تفتحها صناديق الصدور

إن كان مَيَّزْت الكِرَام مْن اللئام