امهليني قَدْر ما اسْرِقْ من شفايفْك السحاب

قَدْر ما ابلّ المعاني واروي احساس القصيد

امهليني بَسّ لحظه أستفيق مْن الرضاب

حالة السِّكْر بْقصيدي كل ما جاها تزيد

أشْعِرْ بْروحي مداين تنفتح لك باب باب

كالجواري الشِّعر فيها والمشاعر لك عبيد

كل ما أشْعَلْت غيمه ألقى صَدْر الشِّعْر ذاب

وكل ما أمْطَرْت معنى سال عطرك بالوريد

اجمعي قَطْر النديّا وارخي عن فجري الحجاب

واقطعي خيط الصباح اللى تبدّى من بعيد

باشْعِلْ الليل بْقصيدي زِيْدي في صدري انسكاب

مَخْطِرِيْ كل القوافي رَوّضي الحرف العنيد

كَنّ بك بيض الليالي لَفّهن جنْح الغراب

المسا عَرْبَد سواده فوق متن وْفوق جِيْد

تعرفين الشِّعر أمّي وانتي لاحساسه كتاب

وين ما نَقَّل عيونه من عيونك يستفيد

إن قرا صفحه تهَجَّي أوّلك في كل باب

وكل ما أنهى سطورك رَدّ عادِك من جديد

آتِشَرَّبْ لون خَدِّك ومن خضابك لي خضاب

واصْهره في روح شِعْري لين في خَدّك يزيد

قِلْت شيطاني تنسَّك وشاعرك يا بنت تاب

بَسّ من شِفْتِكْ تمرّد كل شيطانٍ مريد

(اعطني النايَ وغَنّي) أشْعِرْ بْروح الشباب

قولي للمارد في شِعْري: شاعري هل من مزيد؟!

قبل ما يِرْتَدّ طَرْفك يجتمع كل السحاب

وتمطر مْزون المعاني ويرتوي عَذْب القصيد