تعبت أقوم بْوَجْه الايّام واطيح

لا طاب جَرْح ولا اندفن واحتسَبْته

يا هي سنيني ما اكتفت بالتباريح

يا ذا الزمن شَكْلي كذا ما عجَبْته

كَنِّي خطا وِيْدَيْن الايام تصحيح

شَيٍ بري مِنّه وْشَيّ ارتكبته

عشرين مَرّن كل أبوهن بتلميح

جَرْحٍ قضا نزفه وْجَرْحٍ عصَبْته

ما كَنّي اللّي شال هَمّ المجاريح

لو هو لَقَبْ مجروح أنا ما كسَبْته

كِلْ ما نشا غيمٍ نشوا له مشافيح

وانا الذي محتاج سيله ونَبْتِه

دَقّيت بابٍ ما اعَرِفْ له مفاتيح

أبطيت أحاوِلْ جَرّحتني خشبْتِه

قِلْت اتركه باكر تجي تشْلَعه رِيْح

أثْري ليالي جُمْعتِه مثل سَبْته

وارخَصْت به ضاري على الفِطَّر الفيح

راس بْدِوِيٍ ما انحنت به رقُبْته

لو راس مالي قشعتينٍ من الشِّيح

سَوَّيتهن فنجال كَيْف وْشَرَبْته