أجْمَلْ من العيد ميعادك مَعَ المصباح

وِرْياح تلهو على شبَّاكِكْ الغافي

يوم الأحِبّه سهارى جيتهم مرتاح

وافي وأقفيت عنهم والوَعَد وافي

يوم الليالي مواعيدٍ بغير جْناح

مَرّيتها شِعْر من روحك من الخافي

يوم انت روح وْجروحك ما لها أشباح

ما شِفْت غدر الخلايق جاك بِخْلافي

توَّه زمانك وتَوّ العمْر في مِسْباح

لا ما انفرَط من يديك وْقِلْت يا كافي

الله يا هو زمانٍ مَرّ بك ما لاح

في عينك إلاّ خيَال العاشق الصَّافي

وَلا تهَيّا لعينك في الزّمان جْراح

ولا حِسَبْت الوفي والصّافي مْجافي

ولا تخيَّلْت الربيع يْكيد لك فَضّاح

ولا تِبَيَّنتْ السِّنافي ما هو سْنافي

ليت الليالي عذارى والسَّهر مصباح

والعيد وَجْهٍ تمنّيته وانا غافي