بجانب كحلك ومشطك وبعض أشياء منثوره
وعطرٍ غامضٍ مثلِك يخبّي في الزجاج أسرار
أنا عشت الهوى قربك مجرّد (صوره مكسوره)
على تسريحتِك عاشت حبيسة كِذْبِةٍ وِغْبَار
أشوفك تنظرين لْها بضحكة عين مسروره
وافكِّر نظرتك شوقٍ معاها جملتين أعذار
واثاري نظرتِك مرّت عليها بس مَجْبوره
قصدتي خلفها وَجْهٍ تشتّت في مرايا الدار
نسيتي.. واصبحت صوره مع الأيَّام مَهْجوره
نسيتي.. وابتدت ترحَل من البرواز.. والأسوار
نسيتي.. بس خَلّيها يا بنت الناس مستوره
نسيتيني.. وانا مثلك نسيتِكْ.. والزمن دَوّار
أنا نفسي بديت أنسى ملامح هذي الصوره
دخيلك لا تخلّيها بألبوم الصوَر تذكار
بديت أنسى شقا نفسي ووجه الحِزْن وِشْعوره
وقولي لْمَن سَألْ عَنْها.. تشابه صورة «الخَوَّارْ»!