لو انّك زماني قَدْر ما تَسْلِبْ تكون أعطيت

رضيت وْقِلْت كانه شَرّ خيري في مقابيلي

لكنّ السالفه متخالفه والهَمّ سَوّى بيت

يمرجِحْني على كيفه وانا في معمعة ويلي

مادام العاقبه جتني كذا يا ليتني ما جيت

لذاك الدرب لى بَعْده تبهذل حالي وحيلي

ألا يا وقتي المغرور وِشْ خَلّيْت وش بقّيْت

تركت الناي يبكي عازفه، يا ما اطوله ليلي

وعيّشت الشِّقي عِيْشة (لعل) ويا (عسى) ويا (ليت)

يا ليت الوقت يصفى له ولعل الوقت يصفي لي

وانا الأوضاع دارسها على كل البحوث أجريت

ولكن ما نفَعْ بَحْثي ولا فادت تحاليلي

ولو أزريت من باكر لاجل باكر ما اقول أزريت

ما اقول إلاّ عسى صوعي يِفكّه بنّي وْهَيْلي

لو انّك يا زماني قَدْر ما تاخِذْ تكون أعطيت

قنَعْت وْقِلْت لو ضاقت فَرَجْهَا في مقابيلي