يا شمس عمري لى على الأرض تمشين
بك تختفي شمس السما بالتلاقي
من وجهك الِمْنوِرْ غدا يَشْرِقْ الزين
ياللي جمالك عَ الملا حيل فاقي
البَدْر لو حَيٍ وهو يَمْلِكْ يْدين
إن كان ضمّك بالصَّدْر والعناقي
هاض الوَلَه منّي وانا حارب البين
وْفِكْري قَطَع سبْقه وبالقلب تاقي
طيفك سكن عيني وَلا فارَقْ العين
وعيني بلا عينك غَلَبْها الفراقي
دامك على خَدّك من الجمر ثنتين
أبى أحْرِقْ كْفوفي وازيد احتراقي
ياللّى قسَمْتي مرهَفْ القلب نصفين
واللّي لشوفك كَم قتلني اشتياقي
ضاقت بي الدنيا وياليت تدرين
حتى الفضا في مقلة العين ضاقي
انتي وانا قلبٍ سكن فيه روحين
بالشوق ينبض بيننا الوِدّ باقي