راشد انكشف له المستور وقرأ المستقبل

بين المبتدأ والمشتهى، شق حمد بن سوقات طريقه ليقتدي ويهتدي بالرجال الذين عاصرهم في حياته.. كتب عنهم الكثير.. حتى أنه امتطى صهوة الكلمات، فارساً إماراتياً، سرعان ما ترجل في تاريخنا المعاصر، ليخلد في بحور شعره من رحلوا ليبقوا في حاضرنا ومستقبلنا شامخين بمواقفهم التاريخية الجريئة.. وهل من مثال على من عاصرهم حمد بن سوقات أقوى من الشيخين الراحلين الحاضرين زايد بن سلطان آل نهيان وراشد بن سعيد آل مكتوم؟.

ينقلك حيث تنداح الذاكرة يسرج خيول الزمن ممتشقا إرثاً من عبق المؤسسين ليكون شاهداً على العصر ينتقل من بين الأيام يرسم ما بين الحرف والكلمة مسافات شاسعة من الود والحب.. علاقته قوية بالرمال والصحراء والبحر.

صور كثيرة تمر أمام ناظريه يخلد الزمن نبطا وشعراً فصيحاً يجمع بين يديه مغاصه الذكريات التي يعتبرها أثمن من اللؤلؤ كيف لا وفي الطرف الآخر راشد وزايد أحبهم وأخلص لهم فاجزوه.

سوقات شهرة جد الوالد

حمد بن أحمد بن خلفان بن سوقات وهذه الشهرة كان جد الوالد يذهب للغوص وعنده سفينة يا محل وحصل فيه «تبراه» وهو شي ما كشفه أحد وكان يأتي كل عشرين يوماً يبيعه ثم يعود فقالوا.

حمد خلفان يسوق سوقات «كان يأتي بالشيء» من هذه النيوة وأصبحت نيوة خلفان موجودة في الخارطة باسم نيوة خلفان جد الوالد اللي اكتشف ان فيها (مغاص زين ولولو طيب) من ياخذله شهر يروح يبيع ويرجع قالوا أحمد بن خلفان يسوق سوقات، وصارت الشهرة على هذه.

المولد والنشأة

أنا مولود في ديرة «منطقة الراس» تعلمنا في المدرسة الأحمدية أيام الشيخ محمد نور ولكنه علم ديني وما تعلمنا على مدارس والدي شيخ علم ولا عنده معاملات وما توظف بأي مكان إلا في مسجد الشيوخ في بر دبي يصلي بهم الجمعة. والدي يكتب ولكن لم نعثر على شي له وهو شاعر بالعربية والنبطية. للأسف لا أحفظ له شي ولكن ما كان يكتبه موجود.

عائلة واحدة

جميع أهل دبي كانوا عايلة واحدة ولا فرق هذا من فلان وهذا بن فلان مثلاً إذا أنا طالعت ولدك وشفته في محل لا يليق به أخذت الولد «نهرت وغضبت منه وبخته..» عليه ولما ياتي لبوه يخبره فلان «فتن علي» الوالد يرد عليه «لو ما شافك بالمحل اللي كنت فيه موبطيب جان ما هزبك» اليوم «ماتروم تقول للولد شي» أول ما تقول هذا غريب وهذا موب ولدي أيام أول الكل عائلة واحدة.

عدالة الحاكم

منذ كان عمري 15 أو 20 سنة أنا مع الشيخ راشد ما تركته وبعدين اعياله، وبعد الشيخ زايد الله يرحمه الموصوف بالكرم والناس عنده كلهم سوا لين هذا التاريخ.

دبي مركز العالم

من استوت دبي وهي «بندر» ومركزا للسفن الشراعية وبعد فترة تينه البواخر وهذه السفن اللي ترسي في دبي لسبب ان دبي توفر مساحات عبارة عن حوض جاف عندما ترد الماء ومن مسقط لين البحرين تأتي السفن الخشبية إلى هنا ودبي بها كل شي تحتايه السفن اليايه من الهند ومن ملبار محملة الخشب اللي يصنع منه السفينة والحبال والدهان اللي يدهنون به الخشب أي كل شي يتعلق بالسفينة يجدونه في دبي، وسفن الخشب الكبيرة اللي تيي من البصرة ـ العراق، تنزل تمر وتروح لفريقيا وتييب اخشاب ودبي هي المركز وإذا حد بصلح سفينته بيي دبي لانها عبارة عن حوض جاف ومركز تجاري طورها الشيخ راشد عندما تولى الحكم فكر بالخور كان يظهر فيه رمل وما تقدر السفينة الكبيرة»ادش» ياب شركة وحفر الخور ودفن الأراضي وخططها وسواها حق التجارة وكل تاجر اشترى له قسيمة كل 100 ـ 100 اي 10000 المساحة اشتراها وخذ من بعض البنوك وسوى هذي الأراضين، وعادت عليه بالخير لنه باعه للمواطنين موب للاجانب من بعدها سوى المينا وسوى الحوض الجاف والشيخ راشد الله يرحمه، ما كان يوقف عند حد كل ما عمل شي وطوره سوى شي اخر، وعندما «دفن الاراضين» امر البلدية وخططت وسوت قسايم 100 ـ 100 أي كل عشرة آلاف واعطاني «الخوارط» وقال لي بيع على المواطنين اشترى الملا واشترى بن عويس واشترى كلداري وبن موسى وكل تاجر آخذ له قسيمة وقيمتها 700 الف، ولي اتشوفينه من بنايات الحين من العبرة كانت رمل دفنها الشيخ راشد واستعاد فلوسه وخلص دينه كنا انسير جبل علي قبل ما يسوي المينا وسوى خيام والليل انبات وما نعرف الشيخ راشد يايبنه قرب البحر وانبات الناس عند المغرب تروح للشيخ ولما صارت الحفارات تحفر أعلنوا النهار الثاني عن المينا وهو الله يرحمه ما جان يخبر احد إلا المهندسين وناس لهم خصوصية. ويشاورهم في هذه الأشياء نحن ما درينا بهذي الأمور لأنه كل واحد له دوره.

الرأي والمشورة

المواني والتجارة له ناسه التجار هم اللي يشاورهم ويأخذ بشورهم وفي شي ثاني هو ايسوي امور واليوم الثاني لما الناس اتعرف راحوله وأيدوه، رحمه الله لم يعمل شيء غلط ولما عمل المينا بنا بيت له هناك وسار وقال لي هذي الأرض خذها وبنيت بيت ومازال لي بيت للحين بجبل علي، وبعد ما مرض كان يسير هناك كل فترة 10- 15 يوم، ولكن احنا انسير عنده ما فارقنا الشيخ راشد وانا الوحيد بقيت ملازمه لين الله اختاره.

زايد وراشد صنوان

الشيخ زايد سوى مزرعة بالخوانيج وسوى طريج معبد وكهربا، وكان الشيخ راشد لما يي الشيخ زايد وياخذ هل فترة بيوا الحكام يسلمون عليه كنت اسير مع الشيخ راشد ونتقهوى عند الشيخ زايد والساعة 9 ـ 10 نرجع أنا كان عندي خادم يبته وحطيته هني ولما رجعنا الخوانيج قلت للشيخ راشد أنا حطيت خادم هني قال اشتبي اتسويبه قلت ما عرف قال باجر انشرف ثاني يوم سرنا الشيخ زايد وعاودنا قلي ابي اسوي هني بناية قلتله زين قال عيل هذا الطريق اللي سواه زايد للخوانيج هنا بنسوي لين مسقط عمان قلتله شي طيب، قلي ابنعطيك اتسوي محطة بترول وتسويلك محل حق مطعم، ووخل البلدية اطوره لكم أيام «كمال حمزة» (مدير بلدية دبي) يت البلدية وخططت حق 20 بيتا قال نعطيهم حق الناس اللي ما عندهم بيوت والمحتاجين وابتدينا بالراشدية وبعد ما سكنت سنة 1968 قلت للشيخ راشد بيوني ناس قال ما عليك نعطيك خارطة من البلدية أنت ويا كمال واعتمدوا توقيعي اخبر الطلابين انه في ارض 200 وفي ارض 100 في 60 في 60 أغلب الناس ايقولون نبي 60 في 60 لانه في بر واستمرينا على هذا وكل حد خذ وبنى وعقب الشيخ راشد أمر وخطط 200 بيت في الراشدية لين الله استخاره بعدها يينا واحد يبي أرض عطيناه ورقة حق البلدية ـ البلدية يعطوا نمرة «وسووا خوارط» وما شا الله الحين الراشدية كيف استوت مدينة.

عادات يومية

من عادات الشيخ راشد انه كان يركب سيارته من الساعة 7 الصبح ويدور بالبلد «ايحوط» يابنة لين هور العنز كانت أرض خالية قال بعطيك أرض وسو بها شقق وسو دكاكين، قلت طال عمرك ما في ارض خالية قال أنت سو ولا يهمك قلتله انشأ الله اعطاني أرض 50 في 50 وما عندي اساوي أكبر ما عندي قدرة اشتغلنا عليها وابتدينا بالبنا وأثناء البنا ما نشوف إلا والناس يون أول واحد عيسى أبو حميد عطا بينبي أرض وابتديت أنا ومن بعد هذا استوت هور العنز وخططوها ومشت فيها شعبيات المواطنين اللي ما يملكون بيوت عطوهم، أنا كنت الوحيد اللي بنيت فيها قبل بأمر من الشيخ راشد.

أول من بنيت بالحمرية

الحمرية منطقة وين المينا شرق المينا عندنا نخيل انقيض «نصطاف» هناك به يوم واحد وقال لنا بنسير قرب البحر وهني بعطيك أرض قلتله طيب طال عمرك عطاني أرض ما كان عندي قدرة سويتلي حايط حوش بس ولين بنيت ياني محمد عبدالله الكاز وسيف بن حثبور وراشد بن راشد اليتيم وعبدالله القاسمي وناس من أهالي دبي وبنوا، أنا خلاني أول بنيت وبعدين عطاهم بواسطة البلدية بعد يواهل الحمرية اللي هم نزحوا من الحمرية يو زعلانين بعد بنالهم الشيخ راشد البيوت الشعبية ومازالوا لين الحين.

راشد علمنا الزراعة

الشيخ راشد يبي ايسوي منطقة زراعية أنا ييت وسويتلي طوي وحطيت عليه ماكينة وزرعت وكان تعب لا طريج ولاشي وهذا غرب بيت الشيخ زايد من بعد ياني محمد بن عبدالله الكاز ويو اليماعة اللي يبوا يزرعون هناك بدينا في وادي العمردي قال الشيخ راشد اللي بييك ويبي مزرعة عطى ونفذنا امره والحين مازال النخيل عامر وفلل وبيوت ومزارع، كان الله يرحمه الشيخ راشد ينكشفله عن الأشياء كأنه يراها جدام عينه يامرك ايقلك سو وبعد سنة اتشوف الشي استوى واطور.

لا افارق الشيخ راشد

انا كنت المرافق الخاص منين ما تطلع الشمس لين ما يرقد وانا برفجته وكنت أنا اقرب واحد له ويأمرني سو جي وسوي اللي يبي وكنت دايما حاضر عنده وما سير إلا وقت النوم ولما يامرني بالشي وانا ابتدي به. الشيخ راشد عنده النزهة رخصته السنوية ايفضلها بالقنص يقضي شهر واحد ويسير وكنا نقنص بهذي المنطقة ولما اتعسر الصيد هنا سرنا إلى إيران ننزل في منطقة اسمها لنجة ونسير بسيارات للبرونسكن هناك ونقنص نأخذ شهر ونص ونرجع لين لنجة ومن لنجة انعاود دبي، ولما صارت الانقلابات بإيران رجعنا باكستان انسير شهر وبعدين انرد.

إنسانية

راشد لا يميز نفسه عن رعيته

الشيخ راشد كل شيء عنده بسيط وما من الناس اللي عندهم رفاهية وفخفخة والشيخ زايد نفس الشي حالهم حال الناس يلبس مثل ما البس أنا وبكل الأشيا ما تفرقه عن الثاني يعني انقول هذا الشيخ لباسه غير أو خيمته غير لا أبد كلنا سوا لما ايحطون الأكل ايحط إيده على ظهر ربيعه وناكل حلقات وكان اجتماعي، لم يكن شاعر بل يحب الشعر ويحب الشعر العربي أكثر.

اهتمام بالشعر

راشد لم يكن يقرض الشعر ولكنه حفظه واعتني به ويردد هذا البيت:

أزورهم وسواد الليل يشفعلي

وانثني وضياء الصبح يضريبي

وكان هذا البيت كثر ما يردده في الرحلة تأثرت منه وأنا بصفتي شاعر نبط ساويت أبيات تقول:

زرت خلي في غياهيب الظلام

قبل لايضريبي الصبح المنير

وانثنيت أمشي برفق واحترام

لا يشوفني من العالم بصير

يكشف أسراراً مضت لي من أعوام

يصبح وصوله عليّ من العسير

بونهود جاعدات له زمام

ما هضعهن جف مولود صغير

دون شوفك مول ما ياني منام

لا تعذبني وانا بك مستجير

لو بغيت القلب يهدأ يا مدام

يخفج قلبي كما طير يطير

وين صوب لي في سعيد له جاه ومقام

ثابت حبه إلي اليوم الأخير

لك محل في الحشا دون الأنام

في مكان فيه دقات تصير

سيدي لازال شخصك في الأمام

في اتجاهي وين أروح وين اسير

يا حبيب القلب يا عذب الكلام

يا أنيس الروح بك قر النظير

لو بسيّر صوب غيرك بالسلام

بس قصدي لين ميحانك يصير

ما يعذب خالجي مثلك حرام

يا حسين اللون والوجه المنير

طالب ربي لك بحسن الختام

يمحي الزلات والمولى قدير

والختم صلوا عدد نف الغمام

ع النبي المبعوث والهادي البشير

عائلة واحدة

جميع أهل دبي كانوا عايلة واحدة ولا فرق هذا من فلان وهذا بن فلان مثلاً إذا أنا طالعت ولدك وشفته في محل لا يليق به أخذت الولد «وفتنت عليه ولما ياتي لبوه يخبره فلان «فتن علي» الوالد يرد عليه «لو ما شافك بالمحل اللي كنت فيه موبطيب جان ما هزبك»

عادات

تنشر «البيان» حوارات أجراها تلفزيون دبي مع نخبة من الشخصيات المتميزة في مجالات متنامية على الصعيد المحلي والخليجي في برنامج بعنوان: «وجوه عربية»

إعداد ختام البيطار

إخراج حسين بن حيدر

أعدها للنشر عبد المنعم الشديدي