تعال صِبّ الغرام العَذْب يا عمري

معاك طَعْم الحياة أحْلى من السِّكَّر

أبَاشْرَبِكْ لين ما يِثْمَل غلا صَدْري

ما ابيك تبْخَل حبيبي خَلّني أسْكَرْ

قول اش كِثِر هِمْت بي واقول: موكِثْري

وان قِلْت: حَبّيت غيري؟ قِلْت: ما أذْكِرْ

أشٌغَلْت نَبْض العروق إن كِنْت ما تدري

وان كِنْت عارِف.. أمَانه طالِبِكْ تَنْكِرْ!

خَلِّك بداخل خلايا لَهْفتي تجري

معاك يصفى الهوى لو كان مِتْعَكِّر

مجنون بك يا بَعَدْ هالناس من عِذْري

واللي يحِسّ بْجنوني ليش يسْتَنْكِرْ؟

إن غِبْت عَنّي أضيع وْينْشِغِلْ فِكْري

وان جيت يَمّي أتوه وما اقْدَرْ آفَكِّرْ

عِذَّالنا كِثْر ما نعشق بَعَضْ وادري

مهما لبَسْ كل عاذل وَجْه وِتْنَكَّرْ

لو حاوَل انّه يفرِّقْ بيننا.. بَدْري

ما دامك فْـ داخلي والباب مِتْسَكِّرْ

تصِبّ لي حالي الأشواق يا عمري

واقول لك ما اكتفيت وْزِيْدني سِكَّر