شعر: علي الخَوَّارْ

يا الحاسدين إكْلوا ثَرَاكم.. واسْكتوا

ما يَمْلي جُوْع نْفوسكم إلاَّ التراب

(دْبَيّ) عَنْكم فوق دايم.. واشْمتوا

تعوي الذياب وْلا رِمَش جفْن السَّحَاب

وان كان فيكم خَيْر بالخَيْر اثبتوا

واعطوا مِثِلْ ما تعطي بْلَيّا حساب

والاّ احْبسوا هالغِلّ فيكم واكبتوا

لا تفضحون قْلوب مِنْ داخِل خَرَاب

واذا تكَلَّمْنا عن المَجْد.. انصتوا

وِتْعَلّموا كيف الجَمِر يمسي شهاب

من شَمْسنا في (دْبَيّ) بالله اشحتوا

بَعْض الضيا واحموا مِدِنْكم مِ الضباب

قِدّام (رؤية) شيخنا بالله اصمتوا

يمْكِن مَعَ الأيَّامْ توعون الكتاب

ودام الصداره ما قدرتوها.. ارْكِتِوا

خَلْكم محاضِر خَيْر في قول الصواب

نِحْنا حَرَثْنا البَحْر.. وان رِمْتوا انحتوا

صَخْر الشواطي.. وابنوا السَّبْع العِجَاب

واحْذوا حَذُوْنا في التحضّر وافلتوا

من قبضة عْصور التخَلّف والعذاب

بافعالكم.. ما هو بالاقوال.. إلفتوا

أنظار هالْعَالَم لكم من كل باب

واذا خذَتْكم غِيْرِةٍ مِنّا.. اسكتوا

ترى السحاب بْعِيْد عن عَوْي الذياب!!