رحلة شقا والهَمّ عاصِف والحِزِن صوته مخيف

وانا على دَرْب التَّعَب الَمْلِم احساس الدفا

الهَجْر جوعٍ والصَّبِر ما مَدّني إلاّ بْرغيف

والحبّ حالِك دام عَنّه مختفي نور الوفا

وينك ثلاث ايام وِغْيابك على دنياي ضيف

كلْما سألته شِفْت خِلّي..؟! هَزّ راسه لي ونفى

الدَمْع شَرَّعْ والألَم شَوّه تضاريس الرصيف

والروح قريه من معالِمْها الفَرَح ضاع اختفى

الحيره بَحْر وْصَدْري لْمَوجه غدا شاطي وْسِيْف

والقلب يمطرْه الوَلَه.. جَوّ السعاده ما صفا

وينك حرام تْسِلّ من غِمْد الهَجِر والبِعْد سَيْف

تطعنّي به والقلب يترجّى ينادي لك كفى

بَعْض الأمل منّي سقَطْ والبَعْض تسمَعْ له حفيف

شَمْع الأماني ذاب في كفّ الليالي وانطفى

اشْرَب غيابك ساده.. لا سِكَّرْ زياده لا خفيف

مِلْح العنا فيني ترسّب واحتفل بي واحتفى

ما فيني صيف وْلا شِتا ما بي رِبيع وْلا خريف

فيني فصِل خامس على مُجْمَل أحاسيسي طفا

وينك تعال اسمَعْ ضلوع العِشْق تصرخ يا لطيف

يهزّها شوقٍ تعذَّب وسْط نيران الجفا

تعال لَمْلِمْني تراني صِرْت من بَعْدك ضعيف

محتاج أبِلّ عْروقي من عينك وتسقيني الشفا

تعال حَرِّرْ فيني حبّ تْحاصَر بْماذا وكيف

تعال سَكِّت حَشْد يهتف حولي وْيَصْرَخ افا

تعال واْقطَعْ رحلتي باعتبرها سِحْب صيف

كابوس مَرْ بي وانتهى يوم الهوى لحظه غفا