شعر: سهيل بندر المقاطي

لا جفاك الزمان وْحاصَرَتْك الهموم

دَوِّر اللي يشيل الحِمْل واشْتَكْ عَلاه

واحدٍ لا نصيته في اللوازم يقوم

قومته تبْهِج الخاطر وتَرْوي ظماه

ما يشيل الحمول إلاّ قويّ العزوم

والضعِّيْف ضعِّيْف ما رِبِحْ من نخاه

الرفيق الوفي تلقاه عند اللزوم

مثل بيتٍ إلى احتجته يذَرّي ذَرَاه

جاهزٍ للدفاع وْجاهزٍ للهجوم

يا الله تْكَثِّر أمثاله وتحيي نِبَاه

ثابتٍ مِثْل ضِلْع (طْويق) بَيْن الرجوم

لو تهِبّ الهبايب ما تحرِّك حصَاه

فاهمٍ في العوايد فاهمٍ في السلوم

طيّب الساس حرٍ ما يبي له وصاه

ذاك والله رفيقي جِعْل عمره يدوم

يِسْعِد الله صباحه.. يِسْعِد الله مساه

آتشَرَّفْ بمَعْرِفْتِه واقول مْحَشوم

حِشْمِتِه عندي أكبَرْ من (جبال السراه)

أذْكِرِه كلّ ما هَبّت عَلَيّ السموم

هو رصيدي وبَنْكي في بنوك الغَنَاه

يا عساهم تَحَتْ ماطاه كلّ الرخوم

وْيا عسى الله في هالدنيا يطوِّل بقاه

القصايد بمَدْحِه تحْتِفِل كلّ يوم

ولَو مدَحْتِه بِشِعْري كيف أبَالْحَقْ جزاه

والمَرَاجِل صعيبه ما تجي بالعلوم

ما تجي كود بالمجهود طول الحياه

يتْعَب الرَّجْل ما حقَّقْ كثير الحلوم

والصَّبِر يِوْصِل الرَّجال غايَة مِنَاه

والليالي تراها لو صفَتْ ما تدوم

مَيْر يا الله توفِّقْنا طريق النجاه