إذا التيجان تِتْزَخرَف بلُول وْعَسْجَد وْمرجان

فذِكْرِك تاجٍ يْتَوِّج على تاج الشِّعِر تاجه

وإذا الألقاب تِتْفَاوَت ما بين فْلان وبين فْلان

تجِيْك ألقاب هذا الكون تَطْلِب مِنْك محتاجه

وإذا الأشعار تِتْفَاخَر بمَرْسى الحَرْف والأوزان

وصَلْ لك حَرْف من شاعِر لطم شَعَّار بامواجه

نحَتْ مَدّه ، رسَمْ شَدّه على الشاطي بلا أركان

كتَبْ اسمك مسَحْ خصْمك برقعه دون ديباجه

كتَبْ وِيْحِقّ له يكتِبْ كتابه تَرْفض النسيان

مادام الحَرْف في شخصك سجينٍ يَرْفِضْ افراجه

ولانّك نَسْل (بو راشد) رفيع القَدْر عالي الشان

سليل المجد شَهْم الجَدّ مسرى الوَجْد وِسْراجه

ولانّك منْبَر الهامه بقامه ما بها نقصان

فَذِكْرِك نور للديجور .. يحطِّم سور أبراجه

وإذا عَنْوَنْت ذي قِلْتِه لقيت إسمك غدا عنوان

نتاجه مَدْح مِتْجَدِّد وْمِتْأكّد على انتاجه

اسم (فَزَّاعْ) سِكَن الاضلاع بصوره بَرْوَزَتْ (حمدان)

رهيف السيف ساقي الضيف من جوده ومنهاجه

أبو الإعجاز شبيه الباز إذا ما حَرّك الجنحان

قصَفْ خَصْمه بَلا رحمه قَبِل لا يرْجَع أدراجه

شعاره من وصَل باحسان .. يجازى بالحِسِن إحسان

ومن جا له بغير الحِسْن يلقى عنده عْلاجه

سموّ الشيخ لو إسمك تعلّى كَفّة الميزان..

وباقي الناس في كَفّه رجَح إسمك بمِعْراجه.

اليمن