ليت الأمَل يروي ظما الما على فَمْك

هذا شعور الما وهذا شعوري!!

صِرْنا ضحايا فَمْك رَبّي يسَلِّمْك

أثْرِك سبَبْ شِحّ المياه وْغُروري

أسْتَغْفِلْ طْيوفك من الوَجْد وارسِمْك

ضِحْكَه على وَجْهي وساتر لنوري

الله يرْحَم والدينِك ويرحَمْك

الدور دورك بَعْد ما كان دوري

أسألْك باللي مِعْطي الناس واحرَمْك

كَسِّر شكوكك بَعْد تَجْبِر كسوري

من كِثْر ما شِفْت الهوايل بعَالَمْك

طالِع حروفي تِرْتِبِكْ في سطوري

لا تَظْلِم اللي ما رضا الوقت يَظْلِمْك

أهديت قلبه جَرْح واهداك (جوري)

أنا زَرَعْت الفَرْح باطراف مبسَمْك

واسقيته دْموعي وْذِبْلَت زهوري

وانته زَرَعْت الشَّكّ ماني بلايِمْك

سماك تستنكِر توجِّه طيوري

عزَمْتني واكرَمْتني يآه ما اكْرَمْك

شِبَعْت هَمّ وْغَمّ وابقيت سُوري

وانا الذي من نَخْوتي قِلْت أبَاخْدِمْك

ومن طيبتي قِلْت: أعْتِذِرْ عن قصوري!

بَابْلَغْ لُغَه في الكون باكْتِبْ واكَلِّمْك

وانا لِقَوْل الحَقّ صوتي جهوري

تعَبْت أبَيِّنْ لك شعوري وافَهِّمْك

انّي بدونك شَيّ ما هو ضروري!!

متى الْوِي رْقاب المقادير واعْزِمْك

عَلَى قَبِرْ حبّك وْقِمّة حضوري