من يوم ما رَبّي خَلَقْني على الكون

وانا أحِبّ (دْبَيّ) واعْشَقْ ثَرَاها

أحبّها حبٍ متيّم ومَجْنون

لأنّ وسْط القَلْب يَسْكِنْ غَلاها

لا قِلْت فيها الشِّعْر ياتيك موزون

كلْ حَرْف يِتْمَنّى يعانِق هواها

ما اقول فيها الشِّعر عاشِق وْمَشْطون

أقول لا بو الشِّعر كانِه جفاها

هي دِيْرَةْ الإحسان هي دِيْرَةْ العون

هي مزْبَن المظلوم لا من لفاها

فيها الفَخَر والعِزّ والمَجْد مَقْرون

لوحَة شَرَف بالعِزّ كلٍ قراها

ما دام (بو راشد) لها حْجاب وِعْيون

تبقى ويبقى دوم عالي مداها

(بو راشد مْحَمَّد) به الجود مَخْزون

هو شمس دار الحيّ وِهْوَه ضياها

طيبه نِبَتْ وَرْد وْرياحين وِغْصون

غَيْمٍ تشابَكْ فوق عالي سماها

كلْ يوم له إنجاز خافي وْمَعْلون

وفي شَفّ داره كل غالي عطاها

(مِتْرو دبي) انجاز في عَهْد ميمون

عَهْد المكارم بالمكارم كساها

في سرعته كَنّه من البَرْق مَشْحون

يشبه بنات الريح تدوي خطاها

كَذَّبْ به شْكوكٍ وأخْلَفْ به ظْنون

وصَدَّق به عْهودٍ قديمه مضاها

فِعْله يِشِيْب الراس نادر وْمَكْنون

وْبِيْدَيْه صعبات الأمور احتواها

له موقفٍ ثابت وله راي مَضْمون

وله وِجْهِةٍ ما خاب من هو مشاها

(محمد إبن راشد) ولا مِثْله يْكون

أسمه على الهامات عَدّى صداها

يا شيخ حِنّا وْيَاكْ والعَهْد مَصْيون

عَهْد الرجال اللى يشَرِّفْ نِبَاها

آمِرْ وتلقانا لك الشَّفّ والعون

إحْنَا فدا هالدار واحْنَا فداها