شعر: عبدالرحمن المريسي

لا تحْسَب إنّي في البِعِدْ باترَجَّاك

ماني من اللي تَتْرِكه ثمّ يَرْجِيْك

إحْسِبْ حساب الوَقْت لو هو تعَدَّاك

هذي الدقايق لا مشَتْ باتروّيْك

البارحه قلبي صَرَخ لك وناداك

وين المشاعر يوم شِفْتِه يِناديك؟!

لو جيتني تبكي وفَرْحِك تناساك

بذِمِّتِك ترضى أشوفك واخَلِّيْك!

هذا المسا ضَيَّق خفوقي وسَلاَّك

بَعْد الفراق اللي تظِنِّه يسلّيْك

الله يجازي من تسبَّب بفَرْقاك

والله على دَمْعَة عيوني يجازيْك

كِنْت أرتجي عَطْفِك وافَكِّر بلقياك

واليوم ما ابغي في دروبي ألاقِيْك

بُكْرَه مَعَ الأيَّام تعْرِف سواياك

لا صِرْت وَحْدِك والسبايب مَساوِيْك

مهما طلَعْ صِبْحِك وطَوَّل وواساك

لا بدّ من ليلٍ بقَسْوَه يبِكِّيْك

الوَرْد في شَكْلِه تِزَيَّن بالاشواك

وانته مِثِل وَرْدَه وشوكِكْ يحَلِّيْك

الله هو أعْلَمْ في خفايا نواياك

مشكور يا قلبي وتِشْكَر مساعيْك

لا تحْسب إنّي في البِعِدْ باترَجَّاك

الناس ما هي لعبةٍ بين أياديْك