شعر: قمرة

يا جَوّي الهادي المَمْطور

وشمس الغرام الحقيقيّه

يا حَظّي الشامخ المشهور

يا التَّسميات الأميريّه

لا تطري الناس والجمهور

تعال واسمعني شْوَيّه

باموت مِ الحبّ يا (تيمور)

صارت ميولي (عمانيّه)

والعاذل اللي رجَعْ مَقْهور

أكِيْد مَحْروق غِيْريّه

لِك الرضى والوَلا والشور

واوامر الغَيْر مَعْصيّه

يا عالي التسميه والدور

وكَيْف النفوس المزاجيّه

مَرّات أناديك يا دكتور

محتاج وَصْفات طبيّه

يا عاصمة حبّي المعمور

يا الأغنيات الرومَنْسِيّه

أي والله أنّي مَعِكْ مَغْرور

وصَلْت حَدّ المثاليّه

يا عِطْري النادر المَنْثور

مشاعري بك إلهيّه

حبّي لذاتك شعَاع وْنور

وِرْسَايلي لك خصوصيّه

ويّاك نطْلَع (زحَلْ) وِنْزور

ويَّا الطقوس الفضائيّه

واللى قروا شِعْري المسطور

فيه التصاريح ناريّه

وثايقه كَنَّها دستور

محمَّله بالشفافيّه

يمكن سنه أو ثمان شْهور

أغَيِّرْ الخَطّ والنِّيّه

ما أحب أوَقِّف وَرَا الطابور

وْلا اكون منْهم وْعَاديّه

العِذْر لِلْكِلّ دون قْصور

و(جواهر) لْهَا الأخَصِيّه

(باوقِّف النَّشْر والمَنْشور

أفْضَلْ أكون انعزاليّه)