يا حَظّها في حب قلبي لي من الحبّ انْصَهَرْ

ويا كُبْر حَظِّي كل ما مَرّ الغرام فْـ بالها

أسعى لها واحِبّها وافْخَر بها سِرّ وْجَهَرْ

سِرّ وْجَهَرْ أفْخَرْ بها واحِبّها واسعى لها

ما قَبلها أحْدٍ عوّده جفني على طول السَّهر

ما بَعْدَها أحْدٍ عَلّمه يغفى بها ويغفى لها

أشوفها فْـ عين الفَجِر.. وِفْـ مِقْلَة عْيون الظهر

وِفْـ كل عَصْر وْمَغْرِب وْليلٍ هزَجْ مَوّالها

أشوفها فيني وفي كل ما خفى بي أو ظَهَرْ

واشوفها في كل شيْ من حولها وِخْلالها

اباخطب رْضَاها وأبياتي إذا تِرْضى مَهَرْ

وانا ادري انّ الشِّعْر راقي بَسّ ما يرقى لها

هذيك لا مِنْها بدَتْ كَنْها بَدِرْ نِصْف الشَهَرْ

وإذا اسرفت بِغْيابها أرْقِب يهِلّ هْلالها

إذا حكَتْ غار العِطِر واذا سْكِتَتْ غار الزَّهَرْ

وانا في كِلْتا الحالتين أذوب في استرسالها

في جِدّها الجَدّ انْكسَرْ وِبْمَزْحَها المَزْح اشتَهَرْ

يا زينها في ثِقْلَها ويا زينها في خْبالها

إذا وْقِفَتْ تِهْنا بها كْفوف الرياح وْتَزْدِهِر

وِتْصِير غيمه تْضِمّها بِيْمينها وِشْمَالها

واذا مشَتْ تَسْقي الدروب اللي مشَتْ فيها طِهِر

كأنّها غَيْمه تجود بْمائها وِظْلالها

تمشي وحِشْمَه ثوبها كَنْها سْحبَتْ خَلْفِه نَهَرْ

وِيْذوب في فتنة خطاوي رِجْلها خِلْخَالها

أصيلةٍ مِتْسَلْسِلة من نَسْلها بَطْن وْظَهَرْ

من لابةٍ تَفْخَر بها وْتزهى بها وِبْآلها

أكْرَمْ من كْفوف السِّحِب واصْدَق من لْسَان الدَّهَرْ

من جودها الجود اشتكى مَدَّاتها وِجْزالها

إذا فْزَعَتْ تفْزَعْ مِثِل من يَفْزَع لْضيم وْقَهَر

وإذا انْدَهَتْ كل من سمَعْ صوت الندا لَبَّى لها

المبْهِر إنّي كِلّ ما تْعَمّقْت فيها أنْبِهِر

والمِعْجِزْ إنّي كلّ ما اشْرَبْها أزيد أظْمَا لها