طَوَّل غِيَابِك.. وانا مَلّيت بِغْيابك
مَلّيت أرَدِّد: أنا في غيبتك (مَلّيت)!
مَلّيت أكذِّب على نَفْسي بأسبابك
واقول راجع.. وإنْته ما بَعَد حَنّيت
مَلَّيت.. أو بالأصَحْ مَلّتني أبوابك!
واسأل ملامح غيابك في زوايا البيت
ما فيه رِكْنٍ تَرَكْته دون ما جابك!
يا كيف جابِك وَلا ادري به.. ولكِنْ جِيْت!
جِيْت بْصِفَاتٍ كثيره تِشْبه أصحابك
أو جِيْتني في أماني ما بها حَسّيت
أو جيتني وَاصِلٍ في روح أحبابك
أو ما بَعَد جِيْت.. ولكنّى أنا تْمَنَّيْت
مَلَّيت أَرَتِّب شعوري لَحْظَة عْتابك
مَلَّيت أحاوِلْ أسامِح وانت ما أخْطَيْت!
مَلَّيت أحِسّ ان حِلْمي عايش أهدابك
مَلَّيت أبافْهَم غيابك وانت.. ما رَدَّيت
مَلَّيت؟ مَلّيتك؟ أو مَلّيت أعْصَابك!
ما ادري ولكن ترى مِنْ جد أنا تْأذّيت
وانته غيابك ولا ادري ويش سَوَّى بك
أو انت في غَيْبتك يا غايب إش سوّيت!
طوّل غيابك.. وَلا غيره أبَدْ عَابك
طَوَّل غيابِك.. وَلا غيرك أنا حَبّيت
طوَّل غيابك.. وانا ملّيت بِغْيابِك
شِفْ كَمْ غيابِك زرَعْ في داخلي مَلّيت!