زهور الدَّمع

ومرّت في ظلام الليل تسرق نجمتين وْنور

وانا متعكِّزٍ هَمّي على باب السهر والآه

أطالِع كيف شبّاك الحكي دونه توقَّفْ سور

وهبّت نفحةٍ من عطرها اللى ما قدرت أنْسَاه

خليط مْن الحزن والشك في كف المسا مَنْثور

إذا طال المدى وِشْلون نَسْرِقْ ضحكتين شْفَاه

رميتيني بسَهْم الشَّك في صدري وانا مَعْذور

لو اسْرِقْ من جحيم الشوق سيفه واخْتِلِسْ شَلْفاه

واعَلِّمْك انتقام الحب عِنْد الخاطر المَكْسور

إلى مِنّه غَرَقْ في بحر حب وْضَيَّعْ المرساه

أحبّك ليتها كانت حروفٍ تكتسي بِشْعور

لاغَنِّيْها على (ليلى) وكلٍ تطعنه ليلاه

وانا يا ليلتي عاشق واحب وْلا عَلَيّ قْصور

ولكن الزمان اللى نعيشه ما نعَرْف أقصاه

تعالي واسكني قَلْبٍ عليه مْن الدموع زْهور

وشوفي كيف حاربت الزمان ولا قدرت أقواه

أخَذْت مْن الليالي درس يوم ان السنين تْدور

وعَزّيت ابتساماتي بمولد طفلها المأساه

حَلَمْت وكان حلْمي في حقيقة واقعي مَبْتور

تَرَكْته في مهَبّ الريح لِعْيون الأمَلْ تنعاه

تعالي قرّبي كَفِّكْ أبَكْتِبْ لي ثلاث سْطور

وابَنْقِشْ فوق حِنَّاها كلامٍ ما حَدٍ يقراه

إذا كان القفَصْ في داخله يتْمَرْجَح العصفور

ترى العصفور ما هَمّه سوى لقمة ثلاث أفواه

وانا في داخلي هَمٍ يخَلِّيني كذا مَقْبور

إذا الليله لقيت الزاد بكره يا ترى بالقاه؟

طموحي في الزمن يا ليلتي نجمه وْليل وْنور

وقلبك واحتضار الهَم في ليل السَّهَرْ والآه